Եվրահանձնաժողովը սկսում է Հայաստանի հետ վիզային ռեժիմի ազատականացման շուրջ երկխոսությունը

ԵՄ Խորհրդի երեկվա  որոշումից  հետո Հանձնաժողովը երկխոսություն է սկսում Հայաստանի հետ վիզային ռեժիմի ազատականացման շուրջ։ Այս գործընթացը կաջակցի Հայաստանին ԵՄ-ի հետ առանց վիզայի ռեժիմի հասնելու իր երկարաժամկետ նպատակին։ Այս մասին ասվում է Եվրահանձնաժողովի հայտարարության մեջ։

Նշվում է, որ երկխոսությունը կհանգեցնի բարեփոխումների կարևոր ոլորտներում, ներառյալ ճամփորդական փաստաթղթերի անվտանգությունը, սահմանային վերահսկողությունը, միգրացիան և ապաստանը, հասարակական կարգը, արտաքին հարաբերությունները և հիմնարար իրավունքների հարցերը Հայաստանում:

Հանձնաժողովը խստորեն հետևելու է առաջընթացին այս ոլորտներում՝ Եվրոպական խորհրդարանի և Խորհրդի հետ սերտ համագործակցությամբ: Երկխոսությունը կանցկացվի վիզաների ազատականացման գործողությունների ծրագրի (VLAP) շրջանակներում, որը Խորհրդում քննարկումից հետո կներկայացվի Հայաստանի իշխանություններին: Վիզաների ազատականացումը ավտոմատ գործընթաց չէ. այն կքննարկվի միայն այն ժամանակ, երբ երկխոսությունը հաջողությամբ ավարտվի, և VLAP-ում նշված բոլոր պայմանները բավարարվեն:

Երկխոսության հաջող ավարտից հետո Հայաստանի քաղաքացիների համար ավելի հեշտ և ավելի քիչ ծախսատար կլինի կարճաժամկետ կացության համար Եվրոպա մեկնելը։ Նշվում է, որ  Հայաստանի քաղաքացիներն արդեն օգտվում են ԵՄ-ի հետ վիզաների դյուրացման համաձայնագրի առավելություններից 2014 թվականի հունվարի 1-ից։

Ըստ հայտարարության՝ վիզաների ազատականացման երկխոսության մեկնարկը ԵՄ Արևելյան գործընկերության շրջանակներում Հայաստանի հետ համագործակցության ամրապնդմանն ուղղված մի շարք նախաձեռնությունների հաջորդականությունն է, այդ թվում՝ 2021 թվականի Արևելյան գործընկերության գագաթնաժողովի, որը քննարկում էր վիզաների ազատականացման նոր երկխոսությունների մեկնարկի հնարավորությունը, երբ պայմանները բավարարվեն:

Եվրահանձնաժողովն արձանագրում է, որ ԵՄ-ն և Հայաստանը առաջ են քաշում նոր և հավակնոտ գործընկերության օրակարգ՝ 2024 թվականի ապրիլի 5-ին նախագահ Եվրահանձնաժողովի նախագահ Ուրսուլա  ֆոն դեր Լեյենի, բարձր ներկայացուցիչ Ժոզեպ Բորելի և վարչապետ  Նիկոլ Փաշինյանի հանդիպումից հետո։