ԱՄՆ պետդեպարտամենտի խոսնակը չի հստակեցնում, թե ինչ «ծանր փոխզիջումների» մասին է խոսքը․ Միլլերի պատասխանը Factor TV-ին

«Հայաստանի և Ադրբեջանի միջև համաձայնությունը հնարավոր է, բայց դա երկու կողմից՝ Հայաստանից և Ադրբեջանից կպահանջի բարդ ընտրություններ և ծանր փոխզիջումներ կատարել»,- օրերս հայտարարել էր ԱՄՆ պետդեպարտամենտի պաշտոնական ներկայացուցիչ Մեթյու Միլլերը։

Խաղաղության պայմանագիրը կողմերից ծանր փոխզիջումներ է պահանջում․ Միլլեր

ԱՄՆ պետդեպարտամենտի խոսնակը, սակայն, չէր մանրամասնել, թե կոնկրետ ինչ «ծանր փոխզիջումների» մասին է խոսքը։ Նա միայն նշել էր, թե վաշինգտոնյան եռակողմ հանդիպման ժամանակ կողմերն առաջընթաց են գրանցել, բայց համաձայնագիր դեռ չկա։

Factor TV-ին գրավոր հարցմամբ ԱՄՆ պետդեպարտամենտի խոսնակ Մեթյու Միլլերին խնդրել է պարզաբանել, թե ինչ հնարավոր «ծանր փոխզիջումների» կարող են գնալ Հայաստանն ու Ադրբեջանը։ Խնդրել էինք նաև պատասխանել՝ արդյոք հայտարարության մեջ նշված «ծանր փոխզիջում» արտահայտությունը վերաբերում է, այսպես կոչված, «Զանգեզուրի միջանցք»-ին։

Պետքարտուղարությունից ստացված պատասխանում, սակայն, դարձյալ բացակայում է հստակեցումը․

«Հայաստանն ու Ադրբեջանը վերջին մեկ տարվա ընթացքում զգալի առաջընթաց են գրանցել։ Մենք լիովին աջակցում ենք նրանց ջանքերին և պատրաստ ենք աջակցելու ցանկացած ձևով, որն օգտակար է նրանց»,- ասված է պետդեպարտամենտի խոսնակի պատասխանում։

Նշենք, որ պաշտոնական Երևանն առայժմ չի արձագանքել ԱՄՆ պետդեպարտամենտի խոսնակի հայտարարությանը։ Հարցի հետ կապված Factor TV-ին փորձել էր նաև մեկնաբանություն ստանալ ՀՀ ԱԳՆ-ից։ Արտգործնախարարությանն ուղղված մեր հարցը, սակայն, անպատասխան է մնացել։

Հավելենք նաև, որ ԱՄՆ պետքարտուղարը դեռ այս ապրիլին Բրյուսելում վարչապետ Փաշինյանի և Եվրահանձնաժողովի նախագահ ֆոն դեր Լայենի հետ հանդիպմանը հայտարարել էր, որ աջակցում են Հայաստանի վարչապետի «Խաղաղության խաչմերուկ» ծրագրին՝ ընդգծելով՝ տարածաշրջանային ինտեգրացիան Հայաստանի անվտանգության և բարգավաճման բանալին է։

Մանյա Պողոսյան