12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Չկատարած սպանության համար 41 ամիս բանտում անցկացրած Կունգուրցևին ՀՀ-ն 11 մլն է փոխհատուցել
Հասարակություն
19.07.2024 | 12:51
Չկատարած սպանության մեղադրանքով գրեթե 4 տարի անազատության մեջ անցկացրած Կարեն Կունգուրցևին պետությունը 11 միլիոն դրամ փոխհատուցում է վճարել։ 41 ամիս անարդարացիորեն կալանքի տակ հայտնված Կարեն Կունգուրցևը 2 տարի առաջ դիմել էր Քաղաքացիական դատարան՝ պետությունից պահանջելով փոխհատուցում տրամադրել հոգեկան տառապանքների համար։
Առաջին ատյանի վճռով հայցը բավարարվել էր մասնակի՝ վերջնական փոխհատուցման չափը սահմանելով 9 միլիոն դրամ։ Ֆինանսների նախարարությունը վերաքննիչ բողոք էր ներկայացրել, ինչից հետո Կունգուրցևը նույնպես բողոքարկել էր։ Այս դեպքում երկու կողմի բողոքը մասնակի բավարարելով՝ Վերաքննիչը որոշել էր փոխհատուցման չափը սահմանել 11 միլիոն դրամ։ Գերատեսչությունը կրկին բողոքարկել էր, Վճռաբեկ դատարանը, սակայն, բողոքը վարույթ չի ընդունել։
FactorTV-ն մանրամասն անդրադարձել էր գործին, ուսումնասիրել և պարզել, թե ում մեղավորության կամ թերի աշխատանքի հետևանքով էր երիտասարդ անմեղ տղան հայտնվել ճաղերի հետևում։
11 տարի առաջ Կունգուրցևին մեղադրանք էր առաջադրվել 15-ամյա հանդբոլիստ Դավիթ Հովակիմյանի սպանության համար։ 2013թ. հոկտեմբերի 12-ին Վանաձորի Կայարանի այգում տղան դանակահարվել էր, ինչից հետո՝ մահացել հիվանդանոցում։ Դեպքից ժամեր անց՝ գիշերը, սպանություն կատարելու կասկածանքով աշխատավայրից բռնի ուժով ոստիկանության բաժին էր տարվել այդ ժամանակ 20-ամյա Կարեն Կունգուրցևը, ով դժբախտություն էր ունեցել այդ պահին այգով անցնելու։ Ըստ Կարենի՝ իրեն բաժնում խոշտանգել են և ստիպել մեղքն իր վրա վերցնել: Նա կտրուկ հրաժարվել էր, ինչից հետո՝ կալանավորվել։ Կունգուրցևի դեմ 4 պատանի էր ցուցմունք տվել, որոնցից 2-ը հետագայում դատարանում նշել էին՝ ոստիկանությունում իրենց ուղղորդել են և ճնշել։
Շուրջ երկու տարի տևած դատաքննությունից հետո, այն ժամանակ Լոռու մարզի ընդհանուր իրավասության դատարանի դատավոր Նարինե Հովակիմյանը հռչակել էր Կունգուրցևի անմեղությունը և հենց դատարանի դահլիճից ազատ արձակել 31 ամիս կալանքի տակ գտնվող Կարենին։ Դատախազությունը դատավճիռը բողոքարկել էր Վերաքննիչ դատարան, որտեղ Կունգուրցևին առաջադրված հոդվածը փոփոխվել էր և նա դատապարտվել էր 7 տարվա ազատազրկման։ Դատավճիռը կրկին բողոքարկվել էր, Վճռաբեկ դատարանը նոր քննության էր ուղարկել գործը, սեփական նախաձեռնությամբ նաև փոխել Կունգուրցևի խափանման միջոց կալանքը՝ նրան ազատ արձակելով հենց դատարանի դահլիճից։ Առաջին ատյանում Կարենը կրկին արդարացվել էր, որը Դատախազությունը դարձյալ բողոքարկել էր, սակայն այս անգամ Վերաքննիչ դատարանը մերժել էր Դատախազության բողոքը։
Փաստացի, սպանության դեպքից 9 տարի անց՝ երրորդ անգամ և արդեն վերջնական հռչակվել էր Կարեն Կունգուրցևի անմեղությունը։
Ռոզա Վարդանյան
