Ռուսական կողմը շահագրգռված է, որ Երևանի և Մինսկի միջև բարդությունների շրջանը հնարավորինս արագ ավարտվի․ ՌԴ ԱԳՆ

Ռուսական կողմը շահագրգռված է, որ Երևանի և Մինսկի միջև առկա բարդությունների շրջանը հնարավորինս արագ ավարտվի։ Այս մասին ՌԻԱ Նովոստիին տված հարցազրույցում ասել է ՌԴ ԱԳ փոխնախարար Միխայիլ Գալուզինը։

Պատասխանելով հարցին՝ արդյո՞ք Ռուսաստանը մտադիր է մասնակցել Հայաստանի վարչապետ Նիկոլ Փաշինյանի և Բելառուսի նախագահ Ալեքսանդր Լուկաշենկոյի միջև կոնֆլիկտի կարգավորմանը, նա նշել է, որ «ցավոք, իրենց համար դժվար է բացատրել այն կոշտ դիրքորոշումը, որը որդեգրել են Հայաստանի իշխանությունները բելառուս գործընկերների նկատմամբ»։

«Ալեքսանդր Լուկաշենկոն միշտ ընդգծել է Մինսկի շահագրգռվածությունը կայուն և անվտանգ Հարավային Կովկասի հարցում։ Նույնիսկ ամենադժվար ժամանակներում Բելառուսի ղեկավարի նախաձեռնություններն ուղղված են եղել հակառակ կողմերին հաշտեցնելուն»,- ասել է Գալուզինը։

Նա նշել է, թե «Մինսկն ու Երևանը դաշնակիցներ են, որոնց հետ Մոսկվան զարգացնում է բազմակողմ համագործակցություն», նաև հավելել, որ «Հայաստանն ու Բելառուսը ԱՊՀ, ՀԱՊԿ և ԵՏՄ անդամ են»։

«Մոսկվան շահագրգռված է, որ մեր ընկերների միջև առկա բարդությունների շրջանը հնարավորինս արագ ավարտվի։ Ամեն դեպքում՝ մենք հուսով ենք, որ ժամանակավոր տարաձայնությունները բացասաբար չեն ազդի ընդհանուր ինտեգրացիոն ասոցիացիաների շրջանակում փոխգործակցության խթանման վրա։ Մենք կոչ ենք անում երկու մայրաքաղաքներին նայել հորիզոնից այն կողմ, գիտակցել այն պահի կարևորությունը, երբ ի հայտ են գալիս նոր աշխարհակարգի ուրվագծերը, որի կառուցման մեջ մենք կցանկանայինք տեսնել ոչ միայն Մինսկին, այլև Երևանին»,- հավելել է Գալուզինը։