Ռուսաստանն ափսոսում է ՆԱՏՕ-ի գագաթնաժողովին Հայաստանի մասնակցության համար․ Գալուզին

Ռուսական կողմը չափազանց ափսոսում է Հայաստանի մասնակցության համար Վաշինգտոնում ՆԱՏՕ-ի գագաթնաժողովին։ Այս մասին ՌԻԱ Նովոստիին ասել է ՌԴ ԱԳ փոխնախարար Միխայիլ Գալուզինը։

«Խոսելով անվտանգության ոլորտի մասին՝ ցանկանում եմ ընդգծել, որ Հայաստանը մնում է ՀԱՊԿ անդամ, և հանդիսանում է բազմաթիվ երկկողմ պայմանագրերի կողմ՝ ռազմական և ռազմատեխնիկական ոլորտներում։ Երևանում եղած մտահոգությունները քննարկելու կառուցողական մոտեցման փոխարեն՝ այնտեղ, ցավոք, ընտրել են այլ ուղի։ Հայաստանը գերադասում է մեծացնել փոխգործակցությունը ՆԱՏՕ-ի կամ դաշինքի առանձին անդամների հետ, հատկապես՝ ՆԱՏՕ-ի չափանիշների ներդրման, զենքի գնման կամ համատեղ մարտական ​​պատրաստության միջոցառումներ իրականացնելու առումով, էլ չեմ խոսում Վաշինգտոնում այս օրերին ընթացող ռազմաքաղաքական դաշինքի գագաթնաժողովին մասնակցելու մասին։ Այս ամենը չի կարող այլ բան առաջացնել, քան ափսոսանք»,- ասել է նա։

Գալուզինը նշել է, թե «այդպիսի տեմպերով համագործակցությունը խորացնելով նրանց հետ, ում նպատակը Ռուսաստանի «ռազմավարական պարտությունն է», Երևանն իր ձեռքով վտանգում է լրջորեն ապակայունացնել իրավիճակը Հարավային Կովկասում՝ ի վնաս սեփական անվտանգության»։

«Կարծում եմ՝ Հայաստանում բանիմաց մասնագետներն ու քաղաքական գործիչները հասկանում են նման անխոհեմ քայլերի հնարավոր հետևանքները»,- հայտարարել է ռուսաստանցի պաշտոնյան։

Ուշագրավ է, որ Գալուզինը որևէ կերպ չի մեկնաբանել ՌԴ-ի ռազմավարական գործընկեր Ադրբեջանի ԱԳ նախարար Ջեյհուն Բայրամովի մասնակցությունը Վաշինգտոնում ՆԱՏՕ-ի գագաթնաժողովի միջոցառումներին։