14.12.2024 | 19:57
Ինչ իրավիճակ է ճանապարհներին 19։35-ի դրությամբ
Հայաստան կժամանի ԱՄՆ պետքարտուղարի ժողովրդավարության և մարդու իրավունքների հարցերով տեղակալը
Քաղաքականություն
10.07.2024 | 17:57
Քաղաքացիական անվտանգության, ժողովրդավարության և մարդու իրավունքների հարցերով ԱՄՆ պետքարտուղարի տեղակալ Ուզրա Զեյան 2024 թվականի հուլիսի 9-17-ը կլինի Վրաստանում և Հայաստանում՝ քննարկելու ժողովրդավարական կառավարումը և կոռուպցիայի դեմ պայքարը, ԶԼՄ-ների և խոսքի ազատությունը, մարգինալացված և խոցելի խմբերի ներառումը:
«Հայաստանում պետքարտուղարի տեղակալ Զեյան կհանդիպի բարձրաստիճան պետական պաշտոնյաների և քաղաքացիական հասարակության ներկայացուցիչների հետ՝ ԱՄՆ-Հայաստան գործընկերության ամրապնդման և օրենքի գերակայության, հակակոռուպցիոն և դատաիրավական բարեփոխումների ոլորտում Հայաստանի ժողովրդավարական նվաճումների առաջխաղացման շուրջ: Նա կայցելի Հայոց ցեղասպանության հուշահամալիր՝ հարգանքի տուրք մատուցելու 1915 թվականի ցեղասպանության զոհերի հիշատակին»,- ասվում է հաղորդագրության մեջ։
Նշվում է, որ «պետքարտուղարի տեղակալ Զեյան նաև կներգրավի ՄԱԿ-ին և Հայաստանում գործող այլ միջազգային կազմակերպությունների՝ աջակցելու խոցելի և մարգինալացված խմբերի անդամներին»։ Բացի այդ, նա կայցելի Հաղպատի վանք՝ նպաստելու կրոնական ազատության նկատմամբ հարգանքին և մշակույթի պահպանմանը։
Վրաստանում պետքարտուղարի տեղակալ Զեյան ներգրավելու է կառավարության, քաղաքացիական հասարակության, ԶԼՄ-ների և խորհրդարանի ներկայացուցիչներին՝ ընդգծելու ԱՄՆ-ի լուրջ մտահոգությունն «օտարերկրյա գործակալների» մասին օրենքի և այլ ոչ լիբերալ օրենսդրության ու վրացական կառավարության վնասակար հռետորաբանության վերաբերյալ, որը Վրաստանի եվրատլանտյան հետագիծը վտանգի տակ է դրել։
«Նա կհստակեցնի, որ կառավարության ոչ ժողովրդավարական պահվածքը և Միացյալ Նահանգների մասին ապատեղեկատվությունը վնասել են մեր երկարամյա հարաբերություններին: Պետքարտուղարի տեղակալ Զեյան նաև կընդգծի ԱՄՆ-ի անսասան աջակցությունը Վրաստանի ինքնիշխանությանը և տարածքային ամբողջականությանը, վրաց ժողովրդի հավատարմությունը եվրաատլանտյան ինտեգրմանը և աջակցությունը Վրաստանին 32 տարվա գործընկերության ընթացքում»,- ասվում է հաղորդագրության մեջ։
