09.09.2026 | 20:47
Ծովինար Վարդանյանը հրաժարվել է ինձ ընդունել, դիմել եմ դատարան. Էդգար Ղազարյան. ՏԵՍԱՆՅՈՒԹ
Մեր սկզբունքային քաղաքականությունն անխախտ է․ Թեհրանը դեմ է միջազգային սահմանների ցանկացած փոփոխության․ Իրանի նորընտիր նախագահը՝ Փաշինյանին
Քաղաքականություն
10.07.2024 | 15:09
ՀՀ վարչապետ Նիկոլ Փաշինյանի ու Իրանի նորընտիր նախագահ Մասուդ Փեզեշքիանի միջև կայացած հեռախոսազրույցի վերաբերյալ իրանական կողմը հաղորդագրություն է տարածել։
Նշվում է, որ Նիկոլ Փաշինյանը շնորհավորել է նախագահական ընտրություններում հաղթանակի կապակցությամբ ու ևս մեկ անգամ ափսոսանք հայտնել Իրանի նախկին նախագահ Էբրահիմ Ռաիսիի կորստի համար։
Ըստ իրանական կողմի՝ Փեզեշքիանն իր հերթին շնորհակալություն է հայտնել ՀՀ վարչապետին շնորհավորական ուղերձի համար։
«Հայաստանը կարևոր դիրք է զբաղեցնում Իրանի հարևանների շարքում, երկրի հետ հարաբերությունները շատ կարևոր են Իսլամական Հանրապետության արտաքին քաղաքական համակարգում։ Թեև Հայաստանի հետ Իրանի սահմանը կարճ է, սակայն այն հույսի ու խաղաղ կյանքի սահմանն է, իսկ մեր սկզբունքային քաղաքականությունը ձեր նկատմամբ անխախտ է»,- նշել է նա։
Ընդգծելով, որ Իրանը հարգում է բոլոր երկրների տարածքային ամբողջականությունը և դեմ է միջազգային սահմանների ցանկացած փոփոխության՝ Իսլամական Հանրապետության նորընտիր նախագահը հայտարարել է. «Մենք աջակցում ենք Հայաստանի և Ադրբեջանի միջև խաղաղ բանակցություններին և պատրաստ ենք այդ հարցում ցանկացած օգնություն ցուցաբերել»։
