Քաղաքականություն
04.07.2024 | 13:07
Թուրքիայի Ռադիոյի և հեռուստատեսության բարձրագույն խորհուրդը (RTÜK) չեղարկել է Açık Radyo անկախ ռադիոկայանի լիցենզիան։ Որոշումը կայացվել է այն բանից հետո, երբ ռադիոկայանը տուգանվել է ապրիլի 24-ին հաղորդման ընթացքում Հայոց ցեղասպանության մասին հիշատակման համար, գրում են թուրքական լրատվամիջոցները։
Լիցենզիայի չեղարկումը հիմնավորվել է ռադիոկայանի կողմից RTÜK-ի սահմանած նախկին պատժամիջոցները չկատարելու պատճառով, որոնք ներառում էին վարչական տույժեր և հեռարձակման հնգօրյա կասեցում: Չնայած տուգանքների վճարմանը՝ Açık Radyo-ն շարունակել է հեռարձակվել, ինչը RTÜK-ը համարել է պատժամիջոցներով սահմանված պայմանների խախտում։
Açık Radyo-ի աղբյուրները լրատվամիջոցներին հայտնել են, որ հայց են ներկայացրել դատարան՝ չեղարկելու առաջին տույժի կատարումը՝ նշելով, որ RTÜK-ը տուգանել է՝ առանց դատարանի որոշմանը սպասելու։
RTÜK-ի անդամ Իլհան Թաշչըն էլ հրապարակավ քննադատել է որոշումը։
«Պատճառը կայանի կողմից ատելություն և թշնամանք հրահրելու համար նախկին հնգօրյա կասեցման հրամանը չկատարելն է։ Հեռարձակողը վճարել է տուգանքը, սակայն չի դադարեցրել հեռարձակումը։ Այս իրավիճակը պետք է մեկնաբանվեր հօգուտ հեռարձակողի»,- ասել է նա։
Լիզենզիայի չեղարկմանը հանգեցրած միջադեպը տեղի է ունեցել ապրիլի 24-ին Açık Radyo-ի «Açık Gazete» հաղորդման ժամանակ, որտեղ հյուրը հիշատակել է Հայոց ցեղասպանությունը՝ հետևյալ ձևակերպմամբ․ «Հայկական, այսինքն՝ օսմանյան հողերում տեղի ունեցած տեղահանությունն ու ջարդերը, ջարդերի 109-րդ տարելիցը, որը կոչվում է ցեղասպանություն։ Գիտեք, որ այս տարի էլ արգելվել է Հայոց ցեղասպանության հիշատակի միջոցառումը»։
RTÜK-ն ի սկզբանե սրան արձագանքել է վարչական տուգանքով և հեռարձակման հնգօրյա կասեցմամբ՝ պատճառաբանելով, որ հաղորդումն ատելություն և թշնամանք է հրահրում։ Տուգանքից հետո ռադիոկայանը հայտարարություն էր տարածել՝ պնդելով, որ հաղորդումը չի կարող մեկնաբանվել որպես ատելություն կամ թշնամանք հրահրող։
Էմմա Չոբանյան
