Փողոցային երաժիշտները բնակիչներին խանգարում են, գիշերային ակումբները՝ ո՞չ. Ոստիկանության մեկնաբանությունը Հյուսիսային պողոտայում երաժշտությունն արգելելու շուրջ

Ինչպես արդեն տեղեկացրել ենք, երեկ Հյուսիսային պողոտայում ոստիկաններն արգելեցին «փողոցային» երաժիշտներին նվագել՝ հորդորելով տեղափոխվել այլ վայր: Երևանի փոխոստիկանապետ Էդգար Պետրոսյանի պնդմամբ՝ տեղի բնակիչներն ահազանգում են, որ իրենց անդորրը խաթարվում է: Արգելքը բոլոր երաժիշտների համար է, ոստիկանությունից ասում են, որ խոսքը բոլոր բնակելի տարածքների մասին է:

Փորձեցինք ոստիկանությունից տեղեկանալ նաև, թե արդյոք դժգոհություններն ու արգելքը միայն փողոցային երաժիշտներին է վերաբերում, թե գիշերային ակումբների աղմուկից ևս բողքներ են ստանում:

«Եթե դուք հետևեք մեր լրահոսին, ապա կտեսնեք, որ բազմաթիվ նման հաստատություններում ստուգումներ են իրականացվել և որոշների գործունեությունը դադարեցվել է, եթե համապատասխան լիցենզիա չեն ունեցել, կամ աղմուկը բարձր է եղել»,- Factor.am-ին ասաց Ոստիկանության հասարակայնության հետ կապի և լրատվության վարչության պետ Աշոտ Ահարոնյանը, չհստակեցնելով, սակայն, թե կոնկրետ քանի նման հաստատություն է փակվել:

Հարցին, իսկ արգելքը բեկանել հնարավո՞ր է, թե այսուհետ նույն Հյուսիսային պողոտայի երաժիշտներին այլևս կարգելվի նվագելը, Ահարոնյանը պատասխանեց. «Ոստիկանությունը գործում է բացառապես օրենսդրությամբ: Կոնկրետ տեղերում, եթե զգուշացվել է, ապա մեջբերվել է, թե կոնկրետ իրավական որ նորմով է արգելվել»:

Ի դեպ, երեկ մեզ հետ զրուցած երաժիշտները, որոնք եկել էին Ուկրաինայից և Վրաստանից, ասում էին, որ իրենց արգելել են առանց պատճառներ նշելու և իրավական հիմքեր ներկայացնելու:

Հ․Գ․ Factor.am-ը գրավոր հարցմամբ կփորձի Ոստիկանությունից պարզել, թե բարձր երաժշտության հետ կապված բնակիչների բողոքների հիման վրա քանի գիշերային ակումբ և այլ հանրայինի օբյեկտ է փակվել: