09.09.2026 | 23:17
Ինչ ե քննարկել Փաշինյանը և Մակրոնը. Կառավարությունը մանրամասներ է ներկայացրել
Սլովակիայի վարչապետի վիճակը կայուն է, բայց դեռ ծանր
Քաղաքականություն
16.05.2024 | 13:08
Բժիշկներին հաջողվել է կայունացնել Սլովակիայի վարչապետ Ռոբերտ Ֆիցոյի վիճակը մահափորձից հետո, հայտնել է պաշտպանության նախարար Ռոբերտ Կալինյակը հոսպիտալում լրագրողների հետ ճեպազրույցում, փոխանցում է ՌԻԱ Նովոստին։
«Գիշերվա ընթացքում բժիշկներին հաջողվել է կայունացնել վարչապետի վիճակը, ձեռնարկվում են հետագա գործողություններ, որոնք պետք է բարելավեն այն»,- ասել է նախարարը։
Նա շնորհակալություն է հայտնել բժիշկներին, ովքեր պայքարել են Ֆիցոյի կյանքի համար, սակայն նշել է, որ իրավիճակը «դեռևս շատ ծանր է՝ վերքերի բարդության պատճառով»։
Գլխավոր բժիշկ Միրիամ Լապունիկովայի խոսքով՝ վիրահատությունը տևել է հինգ ժամ, աշխատել է բժիշկների երկու թիմ։
Նա հաստատել է, որ վարչապետի վիճակը կայունացել է, բայց դեռ ծանր է։
Ռոբերտ Ֆիցոյի դեմ մահափորձ է իրականացվել Բրատիսլավայից 190 կիլոմետր հեռավորության վրա գտնվող Հանդլովա քաղաքում։ Կառավարության արտագնա նիստից հետո վարչապետը դուրս է եկել հավաքված քաղաքացիների մոտ, ինչի ժամանակ էլ հինգ կրակոց է հնչել։ Ըստ լրատվամիջոցների՝ Ֆիցոն վիրավորվել է ուսի և որովայնի շրջանում։ Նրան ուղղաթիռով տեղափոխել են Բանսկա Բիստրիցայի հիվանդանոց և վիրահատել, իսկ հետո արհեստական կոմայի մեջ գցել։
Կրակողը բերման է ենթարկվել։ Սլովակյան ԶԼՄ-ների հաղորդմամբ՝ նա 71-ամյա գրող Յուրայ Ցինտուլան է: Ըստ ՆԳՆ-ի՝ նա առաջնորդվել է քաղաքական դրդապատճառներով։
