06.10.2026 | 22:54
Հայաստանի մի շարք հասցեներում էլեկտրաէներգիայի անջատումներ կլինեն
Առարկություն չունենք «Գոյ»-ի` մասնավոր թատրոնի կարգավիճակով գործելու վերաբերյալ. ԿԳՄՍ փոխնախարար
Հասարակություն
15.05.2024 | 21:30
ՀՀ Կրթության, գիտության, մշակույթի և սպորտի նախարարությունն առարկություն չունի նախկինում գործող «Արմեն Մազմանյանի անվան բեմարվեստի ազգային փորձարարական «Գոյ» կենտրոն» ՊՈԱԿ-ի թատերախմբի`մասնավոր թատրոնի կարգավիճակով գործելու վերաբերյալ. այս մասին Factor TV-ին տեղեկացրել է ԿԳՄՍ նախարարի տեղակալ Դանիել Դանիելյանը` ի պատասխան մեր այն հարցի, թե նախարարությունը համաձա՞յն է արդյոք, որ «Գոյ»-ը դառնա մասնավոր թատրոն:
Փոխնախարարը շեշտել է, որ նշյալ առաջարկը նախարարությունը հնչեցրել է ավելի վաղ` դեռևս տարեսկզբին, որի շուրջ հետագայում թատերախմբի հետ կայացել են քննարկումներ:
Ավելի վաղ «Գոյ»-ի կառավարման խորհրդի նախագահ Սարգիս Արզումանյանը Factor TV-ին տեղեկացրել էր, որ ԿԳՄՍ նախարարությունը համաձայն է, որ «Գոյ»-ը դառնա մասնավոր թատրոն և գործի այդ հիմունքներով: Արդեն որպես անկախ թատրոն, ըստ նրա, «Գոյ»-ը հանդես է գալու 2025-ից և մնալու է իր տեղում՝ նույն շենքում։
ԿԳՄՍ նախարարի տեղակալ Դանիել Դանիելյանը տեղեկացրել է նաև, որ թատերախումբը վերակազմակերպման արդյունքում դարձել է Գ. Սունդուկյանի անվան ազգային ակադեմիական թատրոնի կազմում գործող միավոր և թատերախմբի այն աշխատակիցները, որոնք Գ.Սունդուկյանի անվան ազգային ակադեմիական թատրոնի տնօրինության հետ կկնքեն աշխատանքային պայմանագրեր, կստանան ֆինանսավորում:
Աննա Բաբաջանյան
