11.01.2025 | 22:52
Վարչապետը առաջնահերթ է համարում խաղաղության գործընթացը, թվայնացումը և կոռուպցիայի դեմ պայքարը. ՏԵՍԱՆՅՈՒԹ
Հայաստան-Եվրամիության բազմաշերտ համագործակցությունը զարգացման զգալի ներուժ ունի. Վալդիս Դոմբրովսկիս
Քաղաքականություն
15.05.2024 | 20:07
Հանրապետության նախագահ Վահագն Խաչատուրյանն ընդունել է Եվրոպական հանձնաժողովի գործադիր փոխնախագահ և առևտրի հարցերով հանձնակատար Վալդիս Դոմբրովսկիսի գլխավորած պատվիրակությանը:
Նախագահի աշխատակազմից տեղեկացնում են, որ հանրապետության նախագահը ողջունելով հյուրերին բարձր է գնահատել Հայաստան-Եվրամիություն սերտ համագործակցության առկա մակարդակը և վստահություն հայտնել, որ այն շարունակական բնույթ կունենա:
«Համոզված եմ, որ Ձեր այցելությունը նույնպես իր նպաստը կունենա Հայաստան-ԵՄ խորը համագործակցության հետագա զարգացմանն ու ընդլայնմանը, ցանկանում եմ նաև ընդգծել, որ Հայաստանի իշխանությունն ունի անհրաժեշտ քաղաքական կամքն ու խիզախությունը Եվրամիության հետ փոխգործակցությամբ և աջակցությամբ շարունակել երկրում իրականացվող ժողովրդավարական բարեփոխումների առաջմղումը»,- նշել է նախագահը:
Շնորհակալություն հայտնելով ընդունելության համար, Վալդիս Դոմբրովսկիսը շեշտել է, որ Հայաստան-Եվրամիության բազմաշերտ համագործակցությունը զարգացման զգալի ներուժ ունի, որի կյանքի կոչմանն էլ պետք է ուղղվեն երկկողմ ջանքերը:
Հանդիպման ընթացքում քննարկվել են ֆինանսատնտեսական, էներգետիկայի, ենթակառուցվածքների, կապիտալի շուկայի և այլ ոլորտներին առնչվող հարցեր: Անդրադարձ է կատարվել Եվրամիության հետ համատեղ իրականացվող մի շարք խոշոր նախագծերի իրականացման ընթացքին և առաջիկա նախաձեռնություններին:
Զրույցի ընթացքում կողմերը երկուստեք կարևորել են վերջին տարիներին Հայաստանում կատարված ժողովրդավարական բարեփոխումներն ինչպես տնտեսության, այնպես էլ հանրային կյանքի այլ բնագավառներում: Մտքեր են փոխանակվել Հայաստանում Կանաչ և այլընտրանքային էներգիայի զարգացման հնարավորությունների վերաբերյալ: Այս կապակցությամբ նախագահ Վահագն Խաչատուրյանը շեշտել է, որ Հայաստանի համար բարձր տեխնոլոգիական ոլորտը և այս թվում նաև այլընտրանքային էներգետիկայի զարգացումն առաջնահերթ ուղղություններից է և ներկայումս արդեն իսկ զգալի հաջողություններ արձանագրվել են:
Կողմերը նաև անդրադարձել են Հայաստանի տնտեսության դիվերսիֆիկացման ուղղությամբ արվող քայլերին և այս ճանապարհին առկա խոչընդոտների վերացմանը:
Զրույցի ընթացքում անդրադարձ է կատարվել նաև Հայաստանի կողմից առաջ քաշված «Խաղաղության խաչմերուկ» ծրագրին, այս համատեքստում Հանրապետության նախագահն ընդգծել է, որ կայուն և տևական խաղաղության հաստատումը կարևոր նախապայման է տարածաշրջանի բոլոր երկրների անխոչընդոտ և դինամիկ զարգացման համար: Նախագահը նաև վերահաստատել է Հայաստանի հստակ դիրքորոշումը հարևանների հետ բարիդրացիական հարաբերություններ հաստատելու հարցում՝ միջազգային հիմնարար իրավունքների և նորմերի, երկրների տարածքային ամբողջականության և ինքնիշխանության գերակա սկզբունքների շրջանակում:
