Գալուզինը՝ Արցախում ռուս խաղաղապահների դերի և ՀՀ-ում ԵՄ առաքելության մասին

Ռուս խաղաղապահներն արել են գլխավորը, որի մասին չպետք է մոռանալ՝ նրանք խաղաղություն ու կայունություն են բերել հակամարտող տարածաշրջանին։ Այս մասին հայտարարել է ՌԴ ԱԳ փոխնախարար Միխայիլ Գալուզինը News.ru-ի հետ զրույցում անդրադառնալով Արցախից ռուս խաղաղապահների դուրսբերմանը։

Ռուսաստանցի պաշտոնյան, միաժամանակ, Արցախի դեմ 2023 թվականի սեպտեմբերին իրականացրած ռազմական ագրեսիան ու դրան հետևած էթնիկ զտումն անվանել է «բախումներ»։

«Ինչպես հայտնի է՝ 2023 թվականի սեպտեմբերի 19-20-ին տեղի ունեցած բախումների հետևանքով Ղարաբաղն անցել է Բաքվի լիակատար վերահսկողությանը։ Ռուսական ջանքերի շնորհիվ, այդ թվում՝ մեր վեց խաղաղապահների կյանքի գնով, հաջողվեց խուսափել քաղաքացիական բնակչության զգալի զոհերից։ Խաղաղապահների ակտիվ միջնորդությամբ 2023 թվականի սեպտեմբերի 20-ին, բառացիորեն մեկ օրվա ընթացքում, պայմանավորվածություն ձեռք բերվեց դադարեցնել ռազմական գործողությունները, և բանակցություններ սկսվեցին Ղարաբաղի հայ բնակչության ներկայացուցիչների և Ադրբեջանի իշխանությունների միջև։ Մեր խաղաղապահներն ապաստան են տրամադրել խաղաղ բնակչությանը, հումանիտար օգնություն են հասցրել և կազմակերպել բժշկական տարհանումներ»,- ասել է ՌԴ ԱԳ փոխնախարարը։

Անդրադառնալով ՀՀ-ում տեղակայված ԵՄ քաղաքացիական դիտորդական առաքելությանը՝ Գալուզինը նշել է, թե այն, իբր, «վերածվել է արևմտյան ռազմական գործողության՝ ՆԱՏՕ-ի անդամ երկրների ներգրավմամբ և կասկածելի նպատակներով»։

«Նրա անձնակազմն արդեն առնվազն կրկնապատկվել է, նոր հենակետեր են բացվում։ Այն, որ առաքելությունը հանդիսանում է ԵՄ հիբրիդային պատերազմի գործիք, հաստատում է դրա գաղտնիությունը, հաշվետվողականության բացակայությունը և վերահսկողության բացակայությունը թե՛ Հայաստանի, թե՛ Ադրբեջանի, թե՛ այլ շահագրգիռ երկրների և կառույցների կողմից։ Առաքելությունը բացահայտ զբաղվում է սադրիչ գործունեությամբ, հայ հասարակության մեջ կեղծ գաղափարներ սերմանելով Եվրամիության՝ որպես Հայաստանի «անվտանգության և բարգավաճման աղբյուրի» մասին։ Ավելին, ԵՄ գործունեությունը գնալով ստանում է հակաադրբեջանական և հակաիրանական բնույթ»,- ասել է Գալուզինը։

Նրա կարծիքով՝ «Հարավային Կովկասի բարգավաճման բանալին ներառական երկխոսությունն է, մասնավորապես «3+3» խորհրդատվական տարածաշրջանային հարթակի շրջանակում, ի հայտ եկած խնդիրների հավաքական պատասխանների որոնումը և արտատարածաշրջանային ուժերի աշխարհաքաղաքական թելադրանքին հակազդելը»։