02.06.2026 | 23:01
ԱՄՆ պատվիրակության՝ Ադրբեջան կատարած այցի ընթացքում ստորագրվել են 8 միլիարդ դոլարի համաձայնագրեր
ԱՄՆ պետքարտուղարն Ուկրաինայում է
Քաղաքականություն
14.05.2024 | 12:09
ԱՄՆ պետքարտուղար Էնթոնի Բլինքենը ժամանել է Ուկրաինա՝ ի նշան Ռուսաստանի ռազմական հարձակմանը դիմադրող երկրին աջակցության։ Երկօրյա այցը, որը գաղտնի էր պահվում՝ մինչև երեքշաբթի լուսադեմին Բլինքենի գնացքի ժամանումը, նրա չորրորդ ուղևորությունն է Կիև 2022 թվականի սկզբին ռուսական լայնածավալ ներխուժումից ի վեր, գրում է VOA-ն:
Պետքարտուղարությունը հայտնել է, որ Բլինքենը կհանդիպի Ուկրաինայի նախագահ Վլադիմիր Զելենսկիի, վարչապետ Դենիս Շմիգալի և արտաքին գործերի նախարար Դմիտրի Կուլեբայի հետ։
Ամերիկյան դիվանագիտության ղեկավարը «կքննարկի ռազմադաշտում վերջին զարգացումները, ամերիկյան անվտանգության և տնտեսական նոր աջակցության ազդեցությունը, անվտանգության երկարաժամկետ պարտավորությունները և այլն, ինչպես նաև Ուկրաինայի տնտեսական վերականգնմանն աջակցելու շարունակական աշխատանքը», հայտնել է Պետքարտուղարության խոսնակ Մեթյու Միլլերը։
Պաշտոնատար անձանց տվյալներով՝ Բլինքենը հանդես կգա «հզոր վստահության ուղերձով» այն ժամանակաշրջանում, երբ երկիրն ամբողջ ուժով փորձում է զսպել ՌԴ խոշոր հարձակումը Խարկովի շրջանում՝ երկրի մեծության երկրորդ քաղաքում։
Այցը տեղի է ունենում երեք շաբաթ անց այն բանից հետո, երբ ԱՄՆ Կոնգրեսը վերջապես ընդունել է Ուկրաինային ռազմական օգնության նոր փաթեթը: Բեկումը տեղի է ունեցել Վաշինգտոնում ֆինանսավորման շուրջ մեկ տարուց ավելի տևած երկկուսակցական վեճերից հետո:
