Թուրքիայի ընդդիմադիր կուսակցության ղեկավարը հայտնել է Ադրբեջան այցելելու՝ Ալիևի համաձայնության մասին

Թուրքիայի գլխավոր ընդդիմադիր Ժողովրդահանրապետական կուսակցության ղեկավար Օզգյուր Օզելը Haberturk-ի հետ հարցազրույցում ասել է, որ առաջիկայում այցելելու է Ադրբեջան։ Նա նշել է, որ անցյալ տարի նոյեմբերին կուսակցության նախագահ ընտրվելուց հետո իր առաջին այցը կատարել է Հյուսիսային Կիպրոս, հիմա էլ պատրաստվում է մեկնել Ադրբեջան։

«Այդ ժամանակ ես հանդիպումներ խնդրեցի Ադրբեջանում։ Երկրորդ այցն Ադրբեջան է։ Մենք ծրագրում ենք առաջիկա օրերին այց կատարել Ադրբեջան։ Պարոն Ալիևն ասել է, որ մեր նամակը ստացել է մեր պատգամավորի միջոցով և ցանկանում է շուտով հանդիպել։ Չկա հիմնական ընդդիմադիր կուսակցություն, որը վատ հարաբերություններ ունենա Ադրբեջանի հետ։ Եթե ​​կա սխալ, ապա անհրաժեշտ է այն ուղղել»,- ասել է Օզելը։

Նշենք, որ Ադրբեջանի նախագահ Իլհամ Ալիևը դեռևս 2023 թվականին Թուրքիայում անցկացված նախագահական ու խորհրդարանական ընտրություններում իր աջակցությունն էր հայտնել գործող նախագահ Ռեջեփ Թայիփ Էրդողանին, նաև փորձում էր միջամտել քարոզարշավին։ Նա նաև մեկնել էր Անկարա ու անձամբ իր աջակցությունը հայտնել Էրդողանին։

Իսկ ահա մարտի 31-ին տեղի ունեցած ՏԻՄ ընտրություններում Էրդողանի իշխող «Արդարություն և զարգացում, կուսակցությունը 2002 թվականին իշխանության գալուց ի վեր ամենամեծ պարտությունն է կրել, փոխարենը ընտրություններում հաղթանակ է գրանցել ընդդիմադիր Ժողովրդահանրապետական կուսակցությունը։

Պաշտոնական Բաքուն այդպես էլ չի արձագանքել ընտրություններում Էրդողանի պարտությանը։

Էմմա Չոբանյան