09.09.2026 | 20:19
«Առգրավումներն իրականացվել են կամայականորեն՝ շոուի նպատակով». Գագիկ Խաչատրյանի պաշտպանական կողմը՝ ՔԿ-ի գործողությունների մասին
Ալիևի կուսակցությունը հայտարարել է, որ Ադրբեջանում խորհրդարանական ընտրությունների վաղաժամ անցկացման որոշում դեռ չկա
Քաղաքականություն
10.05.2024 | 14:10
Ադրբեջանում խորհրդարանական ընտրությունների տեղափոխման վերջնական որոշում չկա։ Այս մասին լրագրողների հետ զրույցում հայտարարել է երկրի նախագահ Իլհամ Ալիևի գլխավորած իշխող «Յենի Ադրբեջան» կուսակցության փոխնախագահ, կենտրոնական ապարատի ղեկավար Թահիր Բուդաղովը։
«Կուսակցությունը բոլոր ընտրություններում նախապատրաստական աշխատանք է տանում ոչ միայն ընտրությունների նախաշեմին, այլև ընտրությունների միջակայքում: Ներկայում մենք իրականացնում ենք խորհրդարանական ընտրությունների նախապատրաստման հետ կապված բոլոր անհրաժեշտ աշխատանքները»,- ասել է նա։
Ադրբեջանի Կենտրոնական ընտրական հանձնաժողովի նախագահ Մազահիր Փանախովն օրերս հայտարարել էր, որ ըստ երկրի օրենսդրության՝ խորհրդարանական ընտրությունները պետք է տեղի ունենան այս տարվա նոյեմբերին՝ միաժամանակ հայտնելով, որ դրանք կարող են անցկացվել ժամանակից շուտ։
«Հաշվի առնելով առաջիկա խորհրդարանական ընտրությունները՝ այժմ անհրաժեշտ է որոշակի աշխատանքներ սկսել՝ կապված ընտրական հանձնաժողովների անդամների վերապատրաստման հետ։ Քանի որ խորհրդարանական ընտրությունների ժամանակը համընկնում է COP29-ի հետ, որը հեղինակավոր միջոցառում է և անցկացվելու է Ադրբեջանում, կարող է որոշում կայացվել ընտրությունների օրը փոխելու մասին»,- ասել էր Փանախովը։
Սահմանադրության համաձայն՝ 125 տեղանոց Միլլի Մեջլիսի ընտրություններն անցկացվում են հինգ տարին մեկ անգամ՝ խորհրդարանի լիազորությունների վերջին տարվա նոյեմբերի առաջին կիրակի օրը։ Ընտրությունների օրը հայտարարվում է դրանց անցկացումից երկու ամիս առաջ։
Ըստ շրջանառվող լուրերի՝ խորհրդարանական ընտրությունները կարող են տեղի ունենալ ամռանը։
Էմմա Չոբանյան
