Կալուգայում ԱԹՍ-ն հարվածել է նավթավերամշակման գործարանին․ Խարկովում երկու մարդ է վիրավորվել բնակելի շենքերի հրթիռակոծության հետևանքով

Կալուգայի շրջանում հրդեհ է բռնկվել «Պերվիյ զավոդ» նավթավերամշակման գործարանում՝ անօդաչու թռչող սարքի հարվածի հետևանքով։ Այս մասին շրջանի նահանգապետ Վլադիսլավ Շապշան։ Նրա խոսքով՝ հրդեհն արդեն մարվել է, տուժածներ չկան, գրում է Current Time-ը։

Տեղի բնակիչները Shot-ին պատմել են, որ ժամը 1-ի սահմաններում Ձերժինսկի թաղամասում մի քանի հզոր պայթյուն է լսվել, որից առաջ անօդաչու թռչող սարքերին բնորոշ ձայներ են լսվել։ Դրանից հետո տեղի նավթավերամշակման գործարանի տարածքում հրդեհ ու ծուխ են տեսել։ Astra-ի տվյալներով՝ գործարանի աշխատակիցները տարհանվել են։

Կուրսկի նահանգապետ Ռոման Ստարովոյտը հայտնել է Կորենևսկի շրջանում անօդաչու թռչող սարքի որսալու մասին։ Նրա խոսքով՝ ԱԹՍ-ն պայթել է գետնին, սակայն տուժածներ չկան։

Ռուսաստանի ՊՆ-ն հայտնել է, որ ուկրաինական հինգ անօդաչու թռչող սարք են խոցել Բրյանսկի, Մոսկվայի և Բելգորոդի շրջաններում։ Գերատեսչության հաղորդագրության մեջ ոչինչ չի ասվում Կալուգայի և Կուրսկի շրջանների վրա անօդաչու թռչող սարքերի հարձակման մասին։

Ուկրաինայի զինված ուժերի ռազմաօդային ուժերի հրամանատարությունը հայտնել է, որ մայիսի 9-ի լույս 10-ի գիշերը ռուսական զորքերը հարձակվել են Ուկրաինայի վրա «Շահեդ» տիպի տասը հարվածային անօդաչու թռչող սարքերով և երկու կառավարվող С-300/С-400 հրթիռներով։ Բոլոր անօդաչու սարքերը ոչնչացվել են, հայտնել են ուկրաինացի զինվորականները։

Խարկովի շրջանային վարչակազմի ղեկավար Օլեգ Սինեգուբովը հայտնել է, որ Խարկովին հարվածել են գիշերը։ Երեք առանձնատներում հրդեհ է բռնկվել. Տուժել են 11-ամյա երեխա և 72-ամյա մի կին։

Խարկովի քաղաքապետ Իգոր Տերեխովը հայտնել է, որ հարձակումն իրականացվել է С-300 հրթիռով։ Ամբողջությամբ ավերվել է երկու բնակելի շենք։ Ընդհանուր առմամբ, վնասվել է 26 տուն։ 80 բաժանորդ մնացել է առանց լույսի, 4-ը՝ առանց գազի։