08.12.2025 | 14:10
Նուբարաշենի ՔԿՀ-ում կոնֆլիկտային իրավիճակ է եղել աշխատակիցների միջև. ՔԿԾ պետ․ ՏԵՍԱՆՅՈւԹ
Էրդողանի կուսակցության 1,3 մլն ընտրողներ ՏԻՄ ընտրություններում աջակցել են հիմնական ընդդիմադիր կուսակցությանը․ հարցում
Քաղաքականություն
08.05.2024 | 23:30
Թուրքիայի նախագահ Ռեջեփ Թայիփ Էրդողանի ղեկավարած իշխող «Արդարություն և զարգացում» կուսակցության ավելի քան 1,3 միլիոն կողմնակիցներ մարտի 31-ի տեղական ինքնակառավարման մարմինների ընտրություններում քվեարկել են գլխավոր ընդդիմադիր Ժողովրդահանրապետական կուսակցության (CHP) օգտին։ Այս մասին են վկայում հարցումները, գրում է Turkish Minute-ը։
CHP-ն 47 տարվա մեջ առաջին անգամ հաղթել է ՏԻՄ ընտրություններում՝ ապահովելով 37,7 տոկոս ձայն և պահպանելով վերահսկողությունը հիմնական քաղաքներում, նաև զգալի ձեռքբերումներ այլ շրջաններում, մինչդեռ ԱԶԿ-ն 22 տարվա մեջ առաջին անգամ հայտնվել է երկրորդ տեղում՝ հավաքելով ձայների ընդամենը 35,4 տոկոսը:
Metropoll ընկերության ապրիլյան «Turkey’s Pulse» հետազոտության արդյունքները հրապարակել է ընկերության սեփականատեր, պրոֆեսոր Օզեր Սենջարը։
Ըստ հարցման՝ 2023 թվականի համընդհանուր ընտրություններում ԱԶԿ-ին աջակցած 18,6 միլիոն քաղաքացիներից, ինչը համապատասխանում է ընտրողների 35,3 տոկոսին, 12,2 միլիոնը (23 տոկոս) կրկին քվեարկել է ԱԶԿ-ի օգտին 2024 թվականին, մինչդեռ 1,3 միլիոնը (2,6 տոկոս) քվեարկել է CHP-ի օգտին, 1 միլիոնը (2 տոկոս)՝ իսլամիստական «Նոր բարեկեցություն» կուսակցության (YRP) օգտին, և մոտ 450,000-ը (0,9 տոկոս)՝ «Ազգայնական շարժում» կուսակցության (MHP) օգտին, որը նախագահ Էրդողանի ԱԶԿ-ի ծայրահեղ աջ դաշնակիցն է։
Ընդհանուր առմամբ, ԱԶԿ-ի 500,000 կողմնակիցներ քվեարկել են այլ կուսակցությունների օգտին (1 տոկոս), մինչդեռ 3 միլիոն ընտրող (5,7 տոկոս) կա՛մ չի գնացել քվեարկության, կա՛մ ձայնն անվավեր է ճանաչվել։
Թե՛ Թուրքիայի իշխող կուսակցությանը, թե՛ ազգայնական ընդդիմադիր կուսակցություններին աջակցությունը զգալիորեն նվազել է տեղական ընտրություններում ավելի քիչ ինտենսիվ հռետորաբանությամբ աչքի ընկած քարոզարշավից հետո, քան անցած մայիսի համընդհանուր ընտրությունների նախաշեմին:
Նշվում է, որ ընտրություններում CHP-ի հաջողությանը նպաստող գործոն էր քրդամետ Ժողովուրդների հավասարության և ժողովրդավարության կուսակցության (DEM Party) որոշումը՝ առաջադրել սեփական թեկնածուներին և հրաժարվել CHP-ի հետ դաշինք կազմելուց: Այս քայլը խանգարել է իշխող ԱԶԿ-ին՝ մեղադրել CHP-ին ահաբեկչությանն աջակցելու մեջ՝ այդպիսով խանգարելով իշխող դաշիքին ավելացնելու իր ձայներն ազգայնական հռետորաբանության օգտագործմամբ:
Թուրքիայում քրդամետ կուսակցության անդամները կամ քաղաքական գործիչները հաճախ մեղադրվում են Քուրդիստանի աշխատավորական կուսակցության (PKK) հետ կապ ունենալու մեջ, որին Անկարան համարում է աաբեկչական կազմակերպություն։
Էմմա Չոբանյան
