21.07.2026 | 23:30
Էլեկտրամատակարարման ընդհատումներ՝ Երևանում ու մարզերում
Բրիտանիան վտարելու է ՌԴ ռազմական կցորդին և անշարժ գույքի մի շարք օբյեկտների զրկելու է դիվանագիտական կարգավիճակից
Քաղաքականություն
08.05.2024 | 19:40
Մեծ Բրիտանիան հայտարարել է, որ վտարելու է ռուս ռազմական կցորդին ու Ռուսաստանի հետ կապված անշարժ գույքի մի շարք օբյեկտներ զրկելու է դիվանագիտական կարգավիճակից։ Այս մասին գրում է Reuters, փոխանցում է Current time-ը։
Ներքին գործերի նախարար Ջեյմս Քլևերլին, ելույթ ունենալով խորհրդարանում, ասել է, որ ռուս կցորդը «ռազմական հետախուզության չհայտարարված սպա է»: Մեծ Բրիտանիայում Ռուսաստանի դեսպանատան կցորդի պաշտոնը զբաղեցնում է գնդապետ Մաքսիմ Էլովիկը։
ՌԴ ԱԳՆ պաշտոնական ներկայացուցիչ Մարիա Զախարովան, մեկնաբանելով ռուս ռազմական կցորդի վտարման մասին հաղորդագրությունը, ասել է, որ Մոսկվան «համարժեք պատասխան» կտա։
Բացի այդ, Լոնդոնը մտադիր է սահմանափակումներ մտցնել ռուս դիվանագետներին վիզաների տրամադրման հարցում և կրճատել նրանց Մեծ Բրիտանիայում գտնվելու տևողությունը։ Ջեյմս Քլևերլին նշել է, որ նման միջոցները հետևանք են «Ռուսաստանի վնասակար գործունեության Մեծ Բրիտանիայում և Եվրոպայում»։
Ապրիլին Մեծ Բրիտանիայում հինգ անձի մեղադրել էին «Ռուսաստանի շահերից ելնելով թշնամական գործունեություն» իրականացնելու համար։ Դատախազության տվյալներով՝ նրանք, մասնավորապես, պլանավորել են հրկիզել Ուկրաինայի հետ կապված առևտրային օբյեկտը։
