Քաղաքականություն
08.05.2024 | 13:45
Եվրախորհրդարանի ավելի քան 30 պատգամավորներ ԵՄ դիվանագիտության ղեկավար Ժոզեպ Բորելին կոչ են արել կասեցնել Վրաստանի՝ Եվրամիության թեկնածուի կարգավիճակը: Եվրոպացի պատգամավորների նամակում ասվում է, որ Վրաստանի իշխող «Վրացական երազանք» կուսակցության նախաձեռնած «օտարերկրյա գործակալների» մասին օրենքի ռուսական նմանակի ընդունման գործընթացում խաղաղ ցուցարարներին լռեցնելու և ուժ կիրառելու փորձերը գերազանցել են թույլատրելի չափը։
«Այս պահվածքն է՛լ ավելի է մեծացրել լարվածությունն ու բևեռացումը վրացական քաղաքականության և հասարակության մեջ»,- նշել են Եվրախորհրդարանի պատգամավորները:
Նրանց պնդմամբ՝ այս գործողությունները հակասում են Եվրահանձնաժողովի 9 քայլերին, և որ դա այլևս չի կարելի անտեսել։
«Մենք կոչ ենք անում հաստատակամ դիրքորոշում ունենալ և համապատասխան միջոցներ ձեռնարկել, որոնք հստակ ազդանշան կուղարկեն Վրաստանի կառավարությանը։ Վրաստանի կառավարության և իշխող «Վրացական երազանք» կուսակցության պահվածքը հակասում է ԵՄ թեկնածու երկրի պարտավորություններին։ Ըստ այդմ, Վրաստանի թեկնածուի կարգավիճակը պետք է կասեցվի՝ առանց անդամակցության հետագա առաջընթացի։ Երկրորդ՝ պետք է վերանայվի Եվրամիության կողմից պետական բյուջեի և կառավարության ծրագրերի ֆինանսավորումը։ Երրորդ՝ Վրաստանի առաջընթացը Եվրահանձնաժողովի 2023 թվականի նոյեմբերի 8-ի հանձնարարականի կատարման հարցում պետք է գնահատվի առանց հետագա ուշացման»,- ասված է հայտարարության մեջ։
Եվրախորհրդարանի պատգամավորները Բորելին նաև կոչ են արել «կոշտ դիրք գրավել» և միջոցներ ձեռնարկել, որոնք «հստակ ուղերձ կհղեն Վրաստանի իշխանություններին»։ Նրանք ընդգծում են, որ «վերջին տարիներին անխոնջ աշխատել են՝ աջակցելու վրաց ժողովրդին և ԵՄ-ին միանալու նրա ձգտումներին», և կշարունակեն դա անել, թեև «ժողովրդավարական չափանիշները նույնն են ԵՄ բոլոր թեկնածու երկրների համար և պետք է հարգվեն»։
