15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
10 մլն եվրո վարկ և 2 մլն եվրո դրամաշնորհ՝ Սյունիքում մաքսային և լոգիստիկ կենտրոն կառուցելու համար
Տնտեսություն
08.05.2024 | 13:54
Գործադիրն այսօրվա նիստում հավանություն է տվել Հայաստանի Հանրապետության ու Վերակառուցման և զարգացման եվրոպական բանկի միջև 2 մլն եվրո արժողությամբ «Սյունիքի մաքսային և լոգիստիկ կենտրոն» դրամաշնորհային համաձայնագրի ստորագրման առաջարկությանը։
Ըստ հիմնավորման՝ ծրագրի նպատակն է Սյունիքի մարզի Շաքի գյուղի մոտակայքում (Սիսիանից 7 կմ հեռավորության վրա՝ Հյուսիս-հարավ ավտոմոբիլային միջանցքին հարող տարածքում) գտնվող 7.7 հա հողատարածքում մաքսային և լոգիստիկ կենտրոնի կառուցումը։
Բացի դրամաշնորհից՝ Սյունիքում մաքսային և լոգիստիկ կենտրոն կառուցելու համար ՎԶԵԲ-ից ներգրավվելու են նաև վարկային միջոցներ՝ 10 մլն եվրոյի չափով:
Կառավարության ներկայացրած հիմնավորման մեջ նաև նշվում է, որ ծրագրի շրջանակում նախատեսվում է կառուցել վարչական շենք՝ տանիքում արևային էներգակայանով:
Կենտրոնի տարածքում լինելու են մուտքի և ելքի ուղղությամբ տրանսպորտի մանրամասն զննման, մաքսային ձևակերպումների, բեռնատար տրանսպորտի ռենտգենային զննման մասնաշենքեր, մարդատար տրանսպորտի ռենտգենային զննման հարթակ և այլ ենթակառուցվածքներ: Մուտքի և ելքի ուղղությամբ նախատեսված է 5 ուղեգիծ և 2 կշեռք՝ 100 տոննա կշռողականությամբ:
Մաքսային և լոգիստիկ կենտրոնը հագեցած է լինելու լաբորատոր սարքավորումներով և պարագաներով, ռենտգենաճառագայթային սարքավորումներով՝ մարդատար տրանսպորտի, ձեռքի ուղեբեռի և փոքրածավալ բեռների զննման համար, մարդկանց սքանավորման ռենտգենաճառագայթային սարքավորմամբ, UHF ռադիոկայաններով, տվյալների մշակման կենտրոնով, փաստաթղթեր ընթերցող, փաստաթղթերի իսկությունը ստուգող սարքերով, ելքի և մուտքի հատվածներում տեղադրվող հակաճառագայթային, բեռնատար մեքենաների տվյալները գրանցող սարքավորումներով և այլն:
Նշենք, որ ՀՀ մաքսային ենթակառուցվածքը ներկայում բաղկացած է սահմանային մաքսային մարմիններից, մաքսատուն-վարչություններից, ժամանակավոր պահպանման պահեստներից, մաքսային պահեստներից։
