Պառակտվածությունը դառն է լինելու, անձնական հաշիվները դրե՛ք մի կողմ ու երկրի մասին մտածեք. Հաղթանակ Շահումյան․ ՏԵՍԱՆՅՈՒԹ

«Պառակտվածությունը մեզ վրա դառը հետքեր է թողնելու, այսօր անձնական հաշիվները պետք է դնել մի կողմ ու երկրի մասին մտածել: Բացի այդ, մեր այս փոքր երկրի համար այսքան մեծ թվով կուսակցություններն իսկական չարիք են դարձել»,- Factor TV-ի հետ զրույցում տեսակետ է հայտնում ՀՀ վաստակավոր նկարիչ Հաղթանակ Շահումյանը:

Նա հարցնում է՝ երկար տարիներ երազել ենք անկախության մասին, որպեսզի հիմա կորցնե՞նք այն. «Մենք ո՛չ կառուցողական ընդդիմություն ունենք, ո՛չ իշխանություն, այսօր մենք բարոյապես ախտահարված ենք»:

Հաղթանակ Շահումյանը, որը երկար տարիներ եղել է Երևանի գլխավոր նկարիչ, մտահոգված է նաև մայրաքաղաքի կառավարման խնդիրներով. «Երևանը չունի գլխավոր ճարտարապետ, դա աբսուրդ է, մշակութային միջավայրը քաղաքից ոչնչացվում է»:

Ինչ վերաբերում է կերպարվեստի բնագավառին, մեր զրուցակիցը կարծում է, որ այն հիմա բարձիթողի վիճակում է։

«30 տարի շարունակ Մշակույթի նախարարության մասնակցությունը կերպարվեստի զարգացման գործում չեմ տեսել: Այդ կառույցը կարող էր գոնե մի ցուցահանդես անել, ընտրել նկարիչների լավագույն գործերն ու հարստացնել պատկերասրահները, բայց այդ կտավները մնում են նկուղում: Ինձ մտահոգում է նաև մշակույթի, կրթության, գիտության, սպորտի բնագավառների միավորումը մեկ նախարարության մեջ: Այդ բազմաֆունկցիոնալ կառույցը չի կարող իրեն արդարացնել»,- ասում է նա:

Հաղթանակ Շահումյանն անդրադառնում է նաև ստեղծագործական միությունների, այդ թվում՝ Հայաստանի նկարիչների միության շենքի պետականացման հարցին․ «Կառավարությունից ասում են՝ պետականացնում ենք, որպեսզի դրանք անձեռնմխելի լինեն: Բայց ես վստահ եմ, որ միության տարածքները վաճառողներին կարելի է մեր երկրում գործող օրենքներով պատժել, շենքը, տարածքը պետականացնելու կարիք չկա»:

Մանրամասները՝ տեսանյութում:

Աննա Բաբաջանյան