Ինձ դատի տված նկարիչները սպառնում են հաշվեհարդար տեսնել. Կարեն Աղամյան. ՏԵՍԱՆՅՈՒԹ

«Եթե ես յուրացրել եմ նկարիչների միության միջոցները, ու՞ր են դրանք, չկա նման բան։ Այն բանից ի վեր, ինչ ղեկավարում եմ միությունը, մեր ունեցվածքը միայն ավելացել է։ Ամենակարևորը մեր շենքն է՝ քաղաքի կենտրոնում՝ իր երկու ցուցասրահներով, որտեղ ներկայացվում է տարեկան 50-60 ցուցահանդես»,-Factor.am-ի հետ զրույցում պարզաբանում է Հայաստանի նկարիչների միության նախագահ Կարեն Աղամյանը՝ անդրադառնալով իր նկատմամբ հարուցված քրեական գործին։ Գործը հարուցվել է Քրեական օրենսգրքի 179-րդ հոդվածի երրորդ մասի 1-ին կետով՝ առանձնապես խոշոր չափի յուրացում կատարելու հատկանիշով։

Դրա համար հիմք է հանդիսացել նկարիչ Խաչիկ Հարությունյանի դիմումը։ Նա նամակ է գրել վարչապետ Նիկոլ Փաշինյանին և ոստիկանապետ Վալերիյ Օսիպյանին՝ տեղեկացնելով, որ Աղամյանն, առանց համագումարի հաստատման, միությանը պատկանող Աբովյան 16 հասցեում գտնվող 1165 քմ մակերեսով ցուցասրահների մասնաշենքը նվիրատվության պայմանագրով հանձնել է Էդուարդ Թախունցին։

Կարեն Աղամյանը տեղեկացնում է, որ իրեն դեռ չեն կանչել ոստիկանություն, բայց ինքն ունի բոլոր փաստաթղթերը, որոնք ապացուցում են իր անմեղությունը։ Միության նախագահի խոսքով՝ իր դեմ հաղորդում ներկայացրած նկարիչն ու դիմում-բողոքին միացած որոշ նկարիչներ խոսում են անգամ սպառանալիքների լեզվով․ «Այն անձը, որ գնացել է դատարան և էլի նկարիչներ, որոնց ես չգիտեմ, սպառնում են հաշվեհարդար տեսնել ինձ հետ, եթե չհեռանամ միությունից։ Բայց ինձ ընտրությունների ժամանակ միությունում 80-90 տոկոս ձայն են տալիս, անհարմար է ասեմ՝ «ցտեսություն» և գնամ։ Արվեստագետին հարիր չէ մեկ այլ արվեստագետի դատի տալ։ Այդ մարդիկ չեն եկել և ինձ նվիրատվության գործի մասին չեն հարցրել, բայց եթե իրենց իսկապես հետաքրքիր էր, կարող էին գալ»,-պնդում է մեր զրուցակիցը։

Մանրամասները՝ տեսանյութում։

Աննա Բաբաջանյան