ՌԴ-ն մայիսի վերջին կամ հունիսի սկիզբին նոր հարձակման է պատրաստվում Ուկրաինայի հյուսիս-արևելքում

Ուկրաինայի ՊՆ գլխավոր հետախուզության վարչության պետի տեղակալ Վադիմ Սկիբիցկին հարցազրույց է տվել The Economist-ին, որում խոսել է ռուսական բանակի հետագա գործողությունների պլանների մասին և գնահատել Ուկրաինայի զինված ուժերի հեռանկարները ճակատում։ Նրա խոսքով՝ իրավիճակն այնքան ծանր է, որքան չի եղել ռուսական լայնամասշտաբ ներխուժման սկզբից ի վեր, և կարող է է՛լ ավելի վատթարանալ:

Ըստ բարձրաստիճան զինվորականի՝ Ռուսաստանն այժմ պատրաստվում է հարձակման Ուկրաինայի հյուսիս-արևելքում գտնվող Խարկովի և Սումիի շրջաններում: Այդ պլանների իրականացումը կախված է Դոնբասում Ուկրաինայի պաշտպանության կայունությունից։ Հիմնական գործողությունը կսկսվի «մայիսի վերջին կամ հունիսի սկզբին»։

Սկիբիցկին պատմել է, որ ՌԴ-ն ունի, ընդհանուր առմամբ, 514,000 ցամաքային զորք, որոնք ներգրավված են ուկրաինական օպերացիային, ինչը գերազանցում է 470,000-ը, որի մասին անցյալ ամիս հայտնել էր ՆԱՏՕ-ի ղեկավար, գեներալ Քրիստոֆեր Կավոլին:

Ուկրաինացի հետախույզի տեղեկություններով՝ ռուսական հյուսիսային խմբավորումը, որը բազավորված է Խարկովի հետ սահմանին, այժմ շուրջ 35,000 զինվորական ունի, սակայն, ամենայն հավանականությամբ, կհասցվի 50-70 հազարի։ ՌԴ-ն նաև պահեստայինների դիվիզիա կստեղծի (15-ից 20 հազար զինվորականով) ՌԴ կենտրոնական մասում, որը նա կարող է ավելացնել հիմնական ուժերին։ Չնայած գեներալ-մայորը նշում է, որ այս թիվը բավարար չէ խոշոր քաղաք գրավելու համար, The Economist-ը նշում է, որ նման կարծիք ունեն նաև արևմտյան զինվորականները։ Չնայած հավանական են նաև ավելի փոքր մասշտաբներով օպերացիաներ։