Լևոն Քոչարյանի օգնականը մանրամասներ է պատմել լրագրող Դավիթ Լևոնյանի հետ ունեցած միջադեպից

ՀՀ ԱԺ «Հայաստան» խմբակցության պատգամավոր Լևոն Քոչարյանի օգնական Արթուր Սուքոյանը ֆեյսբուքում տեսանյութ է հրապարկել, որում մանրամասներ է պատմել ՔՊ կուսակցության պաշտոնաթերթ Civic.am-ի լրագրող Դավիթ Լևոնյանի հետ տեղի ունեցած միջադեպից։ Տեսանյութը նկարահանվել է մինչ Սուքոյանի կալանավորվելը։

«Տվյալ երիտասարդը վերջին ժամանակաշրջանում աչքի է ընկնում եկեղեցուն վարկաբեկելու իր «առաքելությամբ», որն ինձ համար անընդունելի է։ Այդ նույն բանը փորձում էի այսօր նրան բացատրել, երբ պատահական տեսա ԱԺ բակում։ Մոտեցա ու ասացի, որ երբ թիրախավորում են եկեղեցին, և արշավ են սկսում եկեղեցու դեմ, դա ինձ համար որպես հայ ու որպես քրիստոնյա անընդունելի է։ Նրան ասացի, որ երբ մարդը պիղծ բաներ է վերագրում եկեղեցուն և հոգևորականներին, դա բարոյազուրկ պրոցես է»,- տեսանյութում ասում է Արթուր Սուքոյանը։

Ըստ Սուքոյանի, ի պատասխան, Դավիթ Լևոնյանը նույն մեղադրանքն է հնչեցրել իր հասցեին, որից հետո նա հարվածել է լրագրողին։

«Մեկ անգամ հարվածել եմ, նա ընկել է գետնին, ընկած վիճակում չեմ խփել, չեմ մոտեցել։ Նա ոտքի կանգնեց, սկսեց ինչ-որ բաներ բղավել, բայց այդ սադրանքներին չեմ տրվել, ավել ոչ մի բան չեմ արել, որովհետև առհասարակ այդ մի խփելուն էլ շատ կողմ չէի։ Բայց երբ մարդիկ անցնում են կարմիր գծերը, ինձ համար շատ ցավոտ է։ Ցավագին է, որ այսօր հայ առաքելական եկեղեցին թիրախավորված է հենց ՀՀ-ում ու հայերի կողմից։ Տվյալ երիտասարդը մինչև վերջ չհասկացավ՝ իմ բողոքն ու զայրույթն ինչի մեջ էր»,- եզրափակել է Լևոն Քոչարյանի օգնականը։

Նշենք, որ միջադեպից հետո լրագրող Դավիթ Լևոնյանը խորհրդարանում լրագրողներին ասել էր, որ Քոչարյանի օգնականն իրեն հարվածել և հայհոյել է իր մասնագիտական գործունեության շրջանակում հրապարակված մի տեսանյութի պատճառով, որն առնչվում է Տավուշի թեմի առաջնորդ Բագրատ արքեպիսկոպոս Գալստանյանին։ Միջադեպից հետո լրագրողը հանցագործության մասին հաղորդում էր ներկայացրել։ Նույն օրը երեկոյան Քննչական կոմիտեն հայնտեց, որ բռնության գործադրմամբ լրագրողի մասնագիտական օրինական գործունեությունը խոչընդոտելու հատկանիշներով նախաձեռնվել է քրեական վարույթ, իսկ Լևոնյանը ճանաչվել է տուժող։ Հաջորդ օրը՝ մայիսի 1-ին, Սուքոյանը ձերբակալվեց, նրան մեղադրանք առաջադրվեց, դատարանը երկու ամսով կալանավորելու որոշում է կայացրել։

Արփի Հակոբյան