Բլինքենը հանդիպել է Նեթանյահուի հետ

ԱՄՆ պետքարտուղար Էնթոնի Բլինքենը Երուսաղեմում հանդիպել է Իսրայելի վարչապետ Բենիամին Նեթանյահուի հետ, գրում է VOA-ն:

Ըստ Պետքարտուղարության խոսնակ Մեթյու Միլլերի՝ Բլինքենը ընդգծել է, «որ ՀԱՄԱՍ-ն է կանգնած հրադադարի ճանապարհին»։

Գրոհայինները դեռ հրաժարվում են ընդունել պլանը, որով կոչ է արվում  մի քանի շաբաթով դադարեցնել մարտերը: ՀԱՄԱՍ-ը նաև հրաժարվում է պատանդներին ազատ արձակել Իսրայելի բանտերում պահվող պաղեստինցի բանտարկյալների ազատ արձակման դիմաց։

ԱՄՆ դիվանագիտության ղեկավարը Նեթանյահուին ասել է, որ ԱՄՆ-ը դեմ է Գազայի հատվածի հարավում գտնվող Ռաֆահ քաղաքի վրա ցամաքային հարձակման Իսրայելի առաջնորդի կոչին: Իսրայելը պնդում է, որ այնտեղ ՀԱՄԱՍ-ի զինյալների չորս գումարտակ կա, որոնք նա ծրագրում է ոչնչացնել։

«Մենք չենք կարող և չենք աջակցելու Ռաֆահում խոշոր ռազմական գործողությանը առանց արդյունավետ ծրագրի՝ ապահովելու, որ խաղաղ բնակիչները չտուժեն, և մինչ այժմ մենք նման ծրագիր չենք տեսել։ Միևնույն ժամանակ, կան նաև այլ ուղիներ, որոնք մենք կարծում ենք, որ ավելի արդյունավետ միջոցներ են ՀԱՄԱՍ-ի հետ իրական խնդրի լուծման համար, որոնք չեն պահանջում Ռաֆահում խոշոր ռազմական գործողություն»,- ասել է Բլինքենը Իսրայելում կայացած մամուլի ասուլիսում:

ԱՄՆ-ը, ՄԱԿ-ը և բազմաթիվ համաշխարհային առաջնորդներ դեմ են արտահայտվել Ռաֆահի վրա հարձակմանը, քանի որ այնտեղ ապաստան են գտել ավելի քան մեկ միլիոն պաղեստինցի փախստականներ: Նրանցից շատերը պատերազմի առաջին շաբաթներին իսրայելական զինվորականների խնդրանքով լքել են իրենց տները Գազայի հատվածի հյուսիսում:

Նեթանյահուն ասել է, որ Ռաֆահի հարձակումն անհրաժեշտ է Գազայի վրա ՀԱՄԱՍ-ի վերահսկողությունը վերացնելու Իսրայելի նպատակին հասնելու համար: Նա նշել է, որ դա տեղի կունենա անկախ նրանից, արդյոք ՀԱՄԱՍ-ի հետ համաձայնություն ձեռք կբերվի զինադադարի և պատանդների ազատ արձակման վերաբերյալ, թե ոչ։

«ՀԱՄԱՍ»-ը պետք է որոշի՝ կընդունի՞ արդյոք այդ համաձայնագիրը, և արդյո՞ք այն իրականում կբարելավի իրավիճակը Գազայում գտնվող մարդկանց համար, որոնց մասին պնդում են, թե մտահոգված են», – ասել է Բլինքենը: – Հապաղել չի կարելի: Հետագա սակարկությունների ժամանակ չկա։ Համաձայնագիր է առաջարկվել։ Նրանք պետք է ընդունեն այն»:

Նրա խոսքով՝ եթե ՀԱՄԱՍ-ը չհամաձայնի հրադադարին, դա «հավելյալ ապացույց կլինի, որ նա չի մտածում պաղեստինյան ժողովրդի մասին»։