29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Ալիևը Ֆրանսիային ու Եվրոպայի մի շարք այլ երկրների մեղադրել է «նեոգաղութատիրության մեջ»
Քաղաքականություն
01.05.2024 | 15:34
Ադրբեջանի նախագահ Իլհամ Ալիևը հայտարարել է, իբր, «եվրոպական մի շարք խոշոր երկրների կողմից իրականացվող նեոգաղութատիրության քաղաքականությանը վերջ դնելու անհրաժեշտության մասին»։
«Աշխարհը չպետք է աչք փակի նեոգաղութատիրության գործելակերպի վրա։ Սա հանգեցնում է բռնի ձուլման, ինչպես դա տեղի է ունենում, օրինակ, Ֆրանսիայի ավելի քան տասը անդրծովյան տարածքներում։ Սա անընդունելի է, դրան պետք է վերջ տրվի»,- ասել է Ադրբեջանի նախագահը Բաքվում միջազգային համաժողովի ժամանակ։
Ալիևը նշել է, թե «անընդունելի է, որ 21-րդ դարում եվրոպական որոշ խոշոր երկրներ այլ երկրների վերաբերվում են որպես գաղութների»։
«Երբ մենք բարձրացրինք այս հարցը միջազգային մակարդակով, ինչպես նաև Չմիավորման շարժման մեր նախագահության ժամանակ, մենք դա արեցինք ոչ թե այն պատճառով, որ դեմ ենք որևէ երկրի, այլ այն պատճառով, որ պաշտպանում ենք արդարությունը և միջազգային իրավունքը»,- ասել է նա։
Այսպիսով, Ալիևը շարունակում է Բաքվի հակաֆրանսիական քաղաքականությունը, որն իրականացվում է Արցախյան 44-օրյա պատերազմից հետո։ Ադրբեջանը կալանավորել է Ֆրանսիայի քաղաքացու՝ մեղադրելով, իբր, լրտեսության մեջ, ինչպես նաև ֆրանսիական դեսպանատան երկու աշխատակցի անցանկալի անձ է հայտարարել ու վտարել երկրից։ Հակաֆրանսիական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբ, որը Փարիզի դեմ տարբեր միջոցառումներ է իրականացնում։
Բաքվի նմանատիպ քայլերը հաշվի առնելով՝ Ֆրանսիայի ԱԳՆ-ն ապրիլի կեսերին հայտնել էր, որ հետ է կանչում Ադրբեջանում իր դեսպանին՝ խորհրդակցությունների համար։ Փարիզը հայտնել էր, որ դա կապված է վերջին ամիսներին Ադրբեջանի կողմից երկու երկրների հարաբերությունները վնասող միակողմանի գործողությունների հետ։ Նախօրեին Ֆրանսիայի դեսպանը վերադարձել է Բաքու։
Էմմա Չոբանյան
