21.05.2024 | 22:01
Որքանով են հրակայուն նոր զորանոցները. ՊՆ-ից արձագանքում են քննադատություններին. ՏԵՍԱՆՅՈՒԹ
Ալիևի ներկայացուցիչը հայտարարել է, թե Բաքուն «առանց խտրականության պաշտպանում է բոլոր կրոնական վայրերը»
Քաղաքականություն
01.05.2024 | 12:48
Ադրբեջանի իշխանությունները լրջորեն են վերաբերվում կրոնական վայրերը պաշտպանելու հարցին՝ առանց խտրականություն դրսևորելու։ Նման հայտարարություն է արել Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը։
«Ադրբեջանի տարածքում գտնվող բոլոր շինությունները՝ անկախ նրանց կրոնական ծագումից, մեր հարուստ մշակութային և կրոնական ժառանգության մաս են կազմում, որոնք արտացոլում են մեր բազմազգ և բազմամշակութային հասարակության բնույթը»,- ասել է Ամիրբեկովը իտալական Servizo Informazione Religiosa-ին տված հարցազրույցում։
Նա ասել է, թե 2020 թվականի նոյեմբերին, Արցախյան երկրորդ պատերազմի ավարտով, իրավասու մարմինները գույքագրել են բոլոր մշակութային և կրոնական վայրերն այդ տարածքներում, իսկ հայկական կողմին մեղադրել, իբր, «մշակութային և կրոնական հուշարձաններն ավերելու մեջ»։
Ամիրբեկովն անդրադարձել է նաև Հայաստանի հետ խաղաղության պայմանագրի կնքման հնարավորությանը։
«Մենք հաստատապես հավատում ենք, որ խաղաղության պայմանագիրը, որը, հուսով ենք, կարող է շուտով կնքվել մեր երկրների միջև, ոչ միայն պաշտոնապես վերջ կդնի էթնիկ հակամարտություններից մեկին, այլ նաև կօգնի վստահություն ձևավորել հայերի և ադրբեջանցիների միջև, թույլ կտա նրանց ապրել որպես լավ հարևաններ և մի օր, հուսով եմ, որպես ընկերներ»,- ասել է Ալիևի ներկայացուցիչը։
Նա, սակայն, ոչինչ չի ասել Արցախում ամենօրյա ռեժիմով հայկական կրոնական և մշակութային ժառանգության ոչնչացման մասին։ Միայն վերջին օրերին հրապարակված արբանյակային լուսանկարները փաստում են, որ Ադրբեջանն ավերել է Շուշիի հայկական Ղազանչեցոց գերեզմանոցը, ամբողջությամբ վերացրել հայկական Քարին տակ գյուղն ու հողին հավասարեցրել Շուշիի Կանաչ ժամը՝ Սուրբ Հովհաննես Մկրտիչ եկեղեցին։
Էմմա Չոբանյան
