12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Ադրբեջանը ԵԽԽՎ վերադառնալու ճանապարհ չունի՝ ո՛չ հիմա, ո՛չ հունվարին․ ԵԽԽՎ պատգամավոր
Քաղաքականություն
30.04.2024 | 15:02
ԵԽԽՎ-ում գերմանացի պատգամավոր Ֆրանկ Շվաբեն անդրադարձել է Ադրբեջանի իշխանությունների կողմից Ընտրությունների մոնիթորինգի և ժողովրդավարության ուսուցման կենտրոնի ղեկավար, իրավապաշտպան Անար Մամեդլիի ձերբակալությանը։
«Ադրբեջանի ոչ լեգիտիմ նախագահ Ալիևի շուրջ ձևավորված հանցավոր խումբը համարձակվել է բանտարկել Եվրոպայի խորհրդի Վացլավ Հավելի Մարդու իրավունքների մրցանակի դափնեկիր Անար Մամեդլիին։ Ադրբեջանը Եվրոպայի խորհրդի Խորհրդարանական վեհաժողով վերադառնալու ճանապարհ չունի՝ ո՛չ հիմա, ո՛չ հունվարին»,- գրել է Շվաբեն X-ի իր միկրոբլոգում։
Նշենք, որ Մամեդլին ձերբակալվել է երեկ։ Ադրբեջանական լրատվամիջոցներին հարազատներն այսօր հայտնել են, որ նրան մեղադրանք է առաջադրվել մաքսանենգության համար՝ ՔՕ-ի 206.3.2 հոդվածով (մաքսանենգություն մի խումբ անձանց կողմից դավադրության միջոցով)։ Մինչ այժմ Մամեդլիի ընտանիքի կողմից վարձված փաստաբանը չի հանդիպել նրա հետ։
Ավելի վաղ Մամեդլիի հարազատները հայտնել էին, որ նրա նկատմամբ քննություն է ընթանում Abzas Media-ի գործով։ Նա այս գործով անցնող արդեն 8-րդ մեղադրյալն է։
Ապրիլի 15-19-ը ԵԽԽՎ գարնանային նստաշրջանն է տեղի ունեցել, որին Ադրբեջանն առաջին անգամ չի մասնակցել։ Ձմեռային նստաշրջանի ընթացքում՝ հունվարի 24-ին, ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։
Ֆրանկ Շվաբեն Ադրբեջանի պատվիրակությանը ձայնի իրավունքից զրկելու որոշման նախաձեռնողներից է։
Էմմա Չոբանյան
