09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Բայդենը Եգիպտոսին և Կատարին կոչ է արել ճնշում գործադրել ՀԱՄԱՍ-ի վրա
Քաղաքականություն
30.04.2024 | 16:24
ԱՄՆ նախագահ Ջո Բայդենը Եգիպտոսին և Կատարին կոչ է արել ճնշում գործադրել պաղեստինյան ՀԱՄԱՍ խմբավորման վրա՝ Գազայի հատվածում հրադադարի շուրջ բանակցությունների շրջանակում իսլամիստների ձեռքում մնացած իսրայելցի պատանդների ազատ արձակմանը հասնելու համար։ Այս մասին հայտնել է Սպիտակ տան մամուլի ծառայությունը, փոխանցում է DW-ի ռուսական ծառայությունը։
Նշվում է, որ Ջո Բայդենը հեռախոսազրույց է ունեցել Կատարի էմիր Թամիմ բեն Համադ Ալ-Թանիի, ինչպես նաև Եգիպտոսի նախագահ Աբդել Ֆաթահ աս-Սիսիի հետ։
«Պատանդների ազատ արձակման հարցը միակ խոչընդոտն է հրադադարի անհապաղ հաստատման և Գազայի հատվածի խաղաղ բնակչության վիճակը մեղմելու համար»,- նշել է ԱՄՆ ղեկավարը։
ԱՄՆ-ը, Կատարը և Եգիպտոսը կարևոր միջնորդներ են Իսրայելի և նրա վրա հարձակված ՀԱՄԱՍ ահաբեկչական կազմակերպության միջև հակամարտությունում, հիշեցնում է AFP-ն։ Եգիպտոսի, Կատարի և ՀԱՄԱՍ-ի ներկայացուցիչները ապրիլի 29-ին Կահիրեում բանակցություններ են վարել, սակայն դրանց արդյունքների վերաբերյալ ՀԱՄԱՍ-ի կողմից դեռ որևէ արձագանք չկա։
Վկայակոչելով սեփական աղբյուրներին՝ AFP-ն գրում է, որ իսլամիստների ներկայացուցիչներն արդեն լքել են Եգիպտոսի մայրաքաղաքը և մեկնել Դոհա, որտեղ գտնվում է ՀԱՄԱՍ-ի «քաղաքական բյուրոն»։ Իսլամիստական կազմակերպության պատասխանը պետք է լինի «որքան հնարավոր է՝ շուտ», նշել է գործակալության զրուցակիցը։
Ապրիլի 29-ին ասել է ԱՄՆ պետքարտուղար Էնթոնի Բլինքենն ասել էր, որ ինքը «լիահույս է», որ ՀԱՄԱՍ-ը կհամաձայնի Գազայի հատվածում հրադադարի հաստատման և ահաբեկիչների կողմից պատանդների ազատ արձակման գործարքին:
