02.06.2026 | 23:22
Երևանի տներից մեկում բռնկված հրդեհը մարվել է
Ղազախստանի ՆԳ նախկին նախարարը ձերբակալվել է 2022թ․ հունվարին բողոքի ցույցերի ժամանակ իշխանության չարաշահման գործով
Քաղաքականություն
30.04.2024 | 15:55
Ղազախստանի իրավապահ մարմինները ձերբակալել են երկրի ներքին գործերի նախկին նախարար Էրլան Թուրգումբաևին 2022 թվականի հունվարին զանգվածային անկարգությունների գործով, հայտնում է երկրի Գլխավոր դատախազության մամուլի ծառայությունը։
Գերատեսչության տվյալներով՝ նախկին նախարարը բերման է ենթարկվել ապրիլի 29-ին։ Նա կասկածվում է պաշտոնեական լիազորությունները չարաշահելու մեջ, որն առաջացրել է ծանր հետևանքներ (Ղազախստանի քրեական օրենսգրքի 362-րդ հոդվածի 4-րդ մաս): Քրեական գործով կան տեղեկություններ, որոնք հանդիսանում են պետական գաղտնիք, հետևաբար, «նախաքննության այլ տվյալներ բացահայտման ենթակա չեն»։
Tengri News-ը հիշեցնում է, որ մարտին Գլխավոր դատախազությունը նախկին նախարարին հարցաքննել է իրավապահների նկատմամբ հետաքննության շրջանակում՝ կապված հունվարյան բողոքի ցույցերի ժամանակ օրենքն ու կարգը և անվտանգությունը չապահովելու հետ:
Հիշեցնենք՝ 2022 թվականի հունվարի սկզբին Ղազախստանի արևմուտքում գտնվող նավթագործների Ժանաոզեն քաղաքում բողոքի ակցիաներ են սկսվել հեղուկ գազի գների բարձրացման դեմ։ Այնուհետեւ բողոքի ակցիաները տարածվել են այլ մարզերում, ցուցարարները սկսել են քաղաքական պահանջներ ներկայացնել։
Որոշ քաղաքներում բողոքի ցույցերը վերաճել են անվտանգության ուժերի հետ բախումների և կառավարական շենքերի գրոհի։ Օրինակ՝ Ալմաթիում ցուցարարները մի քանի ժամով գրավել են օդանավակայանը։ Բողոքի ցույցերի առաջին օրերին անվտանգության ուժերը ցրել են ցուցարարներին՝ օգտագործելով արցունքաբեր գազ, լուսաձայնային նռնակներ և ռետինե փամփուշտներ։ Հունվարի 6-ի գիշերն Ալմաթիում հրաձգություն է սկսվել։ Հունվարի 7-ին նախագահ Կասիմ-Ժոմարտ Տոկաևը հրամայել է անվտանգության ուժերին և բանակին առանց նախազգուշացման կրակել «ահաբեկիչների» վրա։
Պաշտոնական տվյալներով՝ անկարգությունների ժամանակ մահացել է 238 մարդ։ Գլխավոր դատախազությունը նաև հայտարարել է, որ Ալմաթիում և այլ քաղաքներում պետական կառույցների, նախագահական նստավայրի, խանութների և այլ շենքերի վրա զինված հարձակումների հետևանքով զոհվել է 92 մարդ։
