Տեխասի համալսարանում ցուցարարների և ոստիկանների միջև բախումներ են գրանցվել, կան ձերբակալվածներ

ԱՄՆ-ի մի շարք համալսարաններում շարունակվում են ուսանողների ցույցերը Գազայում ընթացող պատերազմի դեմ։ Տեխասի համալսարանում ապրիլի 29-ին բախումներ են տեղի ունեցել իրավապահների և ցուցարարների միջև, տասնյակ մարդիկ ձերբակալվել են։ Իսկ Կոլումբիայի համալսարանը ժամանակավորապես արգելել է ցուցարար ուսանողներին մասնակցել դասերին, հայտնում է ABC News-ը:

Անվտանգության ուժերի և ցուցարարների միջև առճակատումը ծագել է ուսանողների դիմադրության արդյունքում, ովքեր հրաժարվել են կատարել համալսարանի ղեկավարության հրահանգները և լքել ուսանողական համալսարանի հարավային բակը, որտեղ կազմակերպվել էր ինքնաբուխ վրանային քաղաք։

«Լսվում էր ցուցարարների վանկարկումները. «Այստեղ անկարգություններ չկան։ Ինչո՞ւ եք պաշտպանիչ հագուստ կրում»։ Քիչ անց ժամանել են ոստիկանները, որոնք բռնի ուժով մաքրել են տարածքը»,- հայտնում է լրատվականը։

Լրագրողները, սակայն, նշել են, որ ցուցարարների մեծ մասը համալսարանում սովորողներ չեն եղել։

Ամբողջ երկրում համալսարաններում վերջին օրերին բողոքի ակցիաների մասնակցող գրեթե 1000 մարդ է ձերբակալվել։ Իսկ Տեխասի համալսարանում ապրիլի 29-ին առնվազն 40 ցուցարար է ձերբակալվել։ Մի խումբ ցուցարարներ շրջապատել են ձերբակալվածներին տանող ոստիկանական մեքենան․ իրավապահներն արցունքաբեր գազ և լուսաձայնային միջոցներ են կիրառել՝ ամբոխը ցրելու համար, գրում է Associated press-ը։

Հավելենք, որ ուսանողները պահանջում են, որ համալսարանները խզեն ֆինանսական կապերն Իսրայելի հետ։ Որոշ հրեա ուսանողներ էլ հայտնել են, որ ցույցերը հակասեմական դրսևորումներ են ստացել։