«Մի մատով երկու աչքդ կհանեմ», «չերեզ ոստիկանություն ընտանիքիդ բռնել կտամ» արտահայտությունների համար դասղեկը ներողություն է խնդրել

Երևանի 140 դպրոցի երկրորդ դասարանի աշակերտի մորաքույր Կարինե Բրեյանն այսօր Factor.am-ին պատմել է, որ դպրոցում երեխայի նկատմամբ դասղեկի հնչեցրած վիրավորանքների մասին տեղեկությունը ճիշտ է։

Հիշեցնենք՝ Երևանի քաղաքապետարանի հանրակրթության վարչության պետ Մարգարիտա Խաչատրյանը երեկ մեզ հետ զրույցում պնդել էր, թե այդ տեղեկությունը չի համապատասխանում իրականությանը։ Կարինե Բրեյանն ընդգծում է՝ երեկ դպրոցում տեղի ունեցած հանդիպման ժամանակ ուսուցիչը ներողություն է խնդրել և ասել, որ վրիպել է։

«Դասղեկը բացատրագիր է գրել և նշել, որ երեխային ասել է «մի մատով երկու աչքդ կհանեմ», «չերեզ ոստիկանություն ընտանիքիդ բռնել կտամ» և, միգուցե, երեխային վախի մթնոլորտում է պահել, բայց ասել է, որ չի ուզեցել նման ձև արտահայտվել», – ասաց երեխայի մորաքույրը՝ հավելելով, որ ապատեղեկատվություն են միայն երեխային հարվածելու մասին տարածվող լուրերը։ Կարինե Բրեյանը հարց է բարձրացնում, եթե երեխան ինչ-որ անկարգ բան է արել, ինչու դասղեկը չի զանգահարում ծնողներին և ասում այդ մասին։

«Ամբողջ գիշեր երեխան չի քնում, մտածում է, որ ոստիկաններ են գալու, դասի չի ցանականում գնալ։ Մենք դասղեկին նաև ասել ենք, որ երեխային դպրոցում անհանգստացնում են, սակայն նա մեզ ոչինչ չի պատասխանել»։

Նրա խոսքով՝ երեխայի նկատմամբ նման պահվածքի պատճառ կարող է լինել դպրոցի դրամահավաքներին չմասնակցելը, որը ըստ երեխայի մորաքրոջ՝ դպրոցում հաճախ է լինում։

Նշենք, որ երեկ samshyan.com-ը գրել էր, որ Երևանի 140 դպրոցում Կարինե Բրեյանի քրոջ երեխայի հասցեին դասղեկը վիրավորանքներ է հնչեցնում, երեխային վախի մթնոլորտում պահում և հարվածներ հասցնում։ Դպրոցի տնօրենը երեկ դպրոցում տիրող իրավիճակի շուրջ մեկնաբանություն տալ չցանկացավ։

Ավելի ուշ Երևանի քաղաքապետարանի հանրակրթության վարչության պետ Մարգարիտա Խաչատրյանը Factor.am-ին փոխանցեց, որ հանրակրթության վարչության աշխատակիցների, ծնողների, ուսուցչի և տնօրինության մասնակցությամբ համատեղ աշխատանքային քննարկում է տեղի ունեցել, որի արդյունքում միջադեպը հարթվել է։

Անի Թամրազյան