07.10.2026 | 14:02
Պուտինն ու Փաշինյանը քննարկել են օրակարգային հարցեր
Իսրայելում մտավախություն ունեն, որ ՄՔԴ-ն Նեթանյահուին ձերբակալելու օրդեր կտա
Քաղաքականություն
29.04.2024 | 13:26
Իսրայելի իշխանություններն ավելի ու ավելի են մտահոգվում, որ Միջազգային քրեական դատարանը (ՄՔԴ) նախատեսում է իսրայելական բարձրաստիճան պաշտոնյաների ձերբակալության օրդեր տալ Գազայի հատվածում ռազմական գործողությունների պատճառով: Այս մասին գրում է The New York Times-ը (NYT)՝ հղում անելով իսրայելցի և օտարերկրյա պաշտոնյաներին։
Նրանց կարծիքով՝ կալանավորման օրդեր կարող է տրվել, այդ թվում՝ Իսրայելի վարչապետ Բենիամին Նեթանյահուի։
Ըստ թերթի զրուցակիցների՝ իսրայելցի պաշտոնյաներին, հնարավոր է, մեղադրեն Գազայի հատված մարդասիրական օգնության առաքումը խոչընդոտելու և 2023 թվականի հոկտեմբերի 7-ին պաղեստինյան ՀԱՄԱՍ-ի հետ պատերազմի օրը Իսրայելի վրա կատարված հարձակմանը չափազանց կոշտ պատասխան տալու համար։ Պաշտոնյաները վստահ են, որ ՄՔԴ-ն դիտարկում է նաև ՀԱՄԱՍ-ի առաջնորդների ձերբակալության օրդեր տրամադրելու հարցը, սակայն կոնկրետ ում մասին է խոսքը, չի նշվում։
Թե ինչ փուլում է որոշման հաստատման գործընթացը, հայտնի չէ։ NYT-ը նշում է, որ ցանկացած օրդեր կպահանջի ՄՔԴ-ի դատավորների կոլեգիայի հաստատումը և «պարտադիր չի հանգեցնի կասկածյալների դատավարության կամ նույնիսկ անհապաղ ձերբակալման»: ՄՔԴ-ն չի մեկնաբանել հրապարակումը։
NYT-ը գրում է, որ միջազգային դատարանի կողմից տրված ձերբակալության օրդերներն «աշխարհի մեծ մասում, հավանաբար, կընկալվեն որպես նվաստացուցիչ բարոյական հանդիմանություն, հատկապես՝ Իսրայելի դեմ, որն ամիսներ շարունակ բախվել է միջազգային հակազդեցության Գազայի հատվածում իր պահվածքի պատճառով», այդ թվում՝ ԱՄՆ նախագահ Ջո Բայդենի կողմից, որն Իսրայելի իշխանությունների գործողություններն անվանել է չափազանցված։ Իսրայելցի մի պաշտոնյա, որի անունը չի նշվում, ասել է նաև, որ ՄՔԴ-ի ձերբակալության օրդերների հնարավորությունն «ազդել է վերջին շաբաթների ընթացքում Իսրայելի որոշումների վրա»:
