Շոլցն Ալիևի հետ հանդիպմանը մանրամասն քննարկել է Ադրբեջանում մարդու իրավունքների վատթար վիճակի և լրագրողների ձերբակալման հետ կապված հարցեր

Գերմանիայի կանցլեր Օլաֆ Շոլցի և Ադրբեջանի նախագահ Իլհամ Ալիևի՝ Բեռլինում անցկացված բանակցությունների հիմնական թեմաներից մեկը եղել է Ադրբեջանում մարդու իրավունքների  և լրատվամիջոցների ազատության  վատթար վիճակը։

«Մանրամասն քննարկել ենք քաղաքացիական հասարակության ու ԶԼՄ-ների ազատության հարցերը։ Կենսունակ ժողովրդավարության անբաժանելի մասն է կրիտիկական քաղաքացիական հասարակությունը: Խոսքի ազատություն, մամուլի ազատություն պետք է լինի։ Գերմանիան նպաստում է աշխարհում մարդու իրավունքների պաշտպանությանը։ Յուրաքանչյուր երկիր պետք է ունենա ազատ մամուլ, մարդու իրավունքները չպետք է ոտնահարվեն։ Տարբեր երկրներում այս իրավիճակը բարելավելու ներուժ կա»,- ասել է Շոլցը։

Abzas Media-ի գործով կալանավորված Իմրան Ալիևի և, ընդհանրապես, անկախ լրատվամիջոցների նկատմամբ ճնշումների մասին լրագրողի հարցին ի պատասխան՝ Իլհամ Ալիևն ասել է, թե «Ադրբեջանում մարդու իրավունքները պաշտպանված են, լրատվամիջոցների ազատությունը՝ ապահովված»։

«Չկա գրաքննություն, կա անվճար ինտերնետ։ Կան հարյուրավոր լրատվամիջոցներ։ Ուստի անարդար կլինի քննադատել Ադրբեջանին ԶԼՄ-ների արգելափակմանն ուղղված քայլերի համար։ Եթե ​​ինտերնետն անվճար է, ի՞նչ սահմանափակումների մասին կարող ենք խոսել։ Ինչ վերաբերում է առանձին խնդիրներին, ապա իրավապահ մարմինները հետաքննում են բոլոր հարցերը։ Որոշ ժամանակ առաջ ձերբակալվել են արտերկրից ապօրինի ֆինանսավորվող որոշ լրատվամիջոցների ներկայացուցիչներ։ Դա արվել է Ադրբեջանի օրենսդրությանը լիովին համապատասխան»,- ասել է Ալիևը։

Նա պնդել է, թե բոլոր կալանավորումներն օրինական են։

«Եթե ​​դրսից անօրինական ֆինանսավորում ստացած լրատվամիջոցի ներկայացուցչի նկատմամբ հետաքննություն  է իրականացվում, դա չի նշանակում, որ մեր լրատվամիջոցներն ազատ չեն։ Բոլորը պետք է գործեն օրենքի սահմաններում։ Մենք, ինչպես ցանկացած այլ երկիր, պետք է պաշտպանենք մեր լրատվական տարածքը արտաքին բացասական ազդեցությունից։ Ադրբեջանն ունի ազատ հասարակություն, մարդիկ ազատ կառուցում ու ստեղծագործում են, այդ թվում՝ լրատվամիջոցների ներկայացուցիչները»,- հայտարարել է Ալիևը։

Հիշեցնենք, որ վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ, ընդդիմադիր գործիչներ ու քաղաքական ակտիվիստներ։ Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։ Միջազգային կառույցները կոչ են անում Ադրբեջանի իշխանություններին դադարեցնել բռնաճնշումներն ու  բոլորին ազատ արձակել։

Նախօրեին էլ Եվրախոհրդարանը բանաձև էր ընդունել՝ կոչ անելով Ադրբեջանի իշխանություններին ազատ արձակել բոլոր քաղբանտարկյալներին։

Էմմա Չոբանյան