14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Եվրախորհրդարանը կոչ է անում պատժամիջոցներ սահմանել ադրբեջանցի պաշտոնյաների դեմ
Քաղաքականություն
25.04.2024 | 16:55
Եվրախորհրդարանը ձայների 474 կողմ, 4 դեմ և 51 ձեռնպահ ձայների հարաբերակցությամբ այսօր ընդունել է բանաձև, որով դատապարտում է Ադրբեջանի իշխանություններին քաղաքացիական հասարակության նկատմամբ բռնաճնշումների համար։
Եվրախորհրդարանի պատգամավորները կոչ են արել Ադրբեջանի իշխանություններին՝ անհապաղ և անվերապահորեն ազատ արձակել 2023 թվականի դեկտեմբերին ձերբակալված իրավապաշտպան Իլհամիզ Գուլիևին և բոլոր մյուս քաղբանտարկյալներին, այդ թվում՝ ԵՄ-ի և այլ երկրների քաղաքացիներին։
«Կոչ ենք անում իշխանություններին՝ չեղարկել ճանապարհորդության արգելքը, հանել տնտեսագետ և ընդդիմադիր գործիչ Գուբադ Իբադօղլուին ուղղված բոլոր մեղադրանքները և նրան անկախ բժշկական օգնություն տրամադրել ապրիլի 22-ին բանտից տնային կալանքի տակ հայտնվելուցց հետո։ Ադրբեջանում մարդու իրավունքների շարունակական խախտումներն անհամատեղելի են COP29-ն ընդունող երկիր լինելու հետ»,- ասվում է բանաձևում:
Եվրոպացի պատգամավորները նաև կոչ են արել Եվրահանձնաժողովին՝ դիտարկել «էներգետիկայի ոլորտում Ադրբեջանի հետ ռազմավարական գործընկերության դադարեցման հարցը»։ Նրանք պնդում են, որ գործընկերության մասին ցանկացած ապագա համաձայնագիր պետք է պայմանավորվի բոլոր քաղբանտարկյալների ազատ արձակմամբ և երկրում մարդու իրավունքների վիճակի բարելավմամբ:
Փաստաթղթում պատգամավորները նաև կրկնում են իրենց կոչը՝ «ԵՄ-ի պատժամիջոցներ սահմանել Ադրբեջանի պաշտոնյաների դեմ, որոնք թույլ են տվել մարդու իրավունքների լուրջ խախտումներ»։
Նշենք, որ ակտիվիստ Իլհամիզ Գուլիևը ձերբակալվել է թմրանյութերի ապօրինի շրջանառության մեղադրանքով այն բանից հետո, երբ նա, լինելով ոստիկանության ոչ պաշտոնական աշխատակից, Abzas Media-ին պատմել է, թե ինչպես է ոստիկանությունը կեղծում թմրամիջոցների հետ կապված քրեական գործերը։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ։ Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։ Միջազգային կառույցները կոչ են անում Ադրբեջանի իշխանություններին դադարեցնել բռնաճնշումներն ու լրագրողներին ազատ արձակել։
Էմմա Չոբանյան
