ԱՄՆ Սենատը վերջնական հավանություն է տվել Ուկրաինայի, Իսրայելի և Թայվանի օգնության փաթեթին

ԱՄՆ Սենատը վերջնականապես հաստատել է Ուկրաինային, Իսրայելին և Թայվանին ռազմական օգնության հատկացումների որոշումը։ Փաթեթի ընդհանուր ծավալը կազմում է 95 մլրդ դոլար, որից 61 մլրդ դոլարը նախատեսված է Ուկրաինայի համար, գրում է BBC-ի ռուսական ծառայությունը։

Այժմ, որպեսզի այս որոշումն ուժի մեջ մտնի, անհրաժեշտ է միայն նախագահ Ջո Բայդենի ստորագրությունը։ Բայդենը Սենատում քվեարկությունից անմիջապես հետո խոստացել է անհապաղ ստորագրել փաստաթուղթը, որից հետո մի քանի օրվա ընթացքում Ուկրաինային կմատակարարվի ռազմական օգնության առաջին խմբաքանակը։

«Սա հրատապ անհրաժեշտ է՝ Ուկրաինայի համար, որը բախվում է Ռուսաստանի կողմից չթուլացող ռմբակոծություններին, Իսրայելի համար, որը հենց նոր բախվել է Իրանի կողմից աննախադեպ հարձակումների, փախստականների ու նրանց համար, որոնք տուժել են հակամարտություններից ու աղետներից ամբողջ աշխարհում, այդ թվում՝ Գազայում, Սուդանում, Հայիթիում և մեր գործընկերների համար, որոնք ձգտում են անվտանգության ու կայունության Հնդկախաղաղօվկիանոսյան տարածաշրջանում։ Այս կարևորագույն օրենքը մեր երկիրն ու աշխարհն ավելի անվտանգ կդարձնի, քանի որ մենք աջակցում ենք մեր ընկերներին, որոնք պաշտպանվում են այնպիսի ահաբեկիչներից, ինչպիսիք են ՀԱՄԱՍ-ը, ու բռնակալներից, ինչպիսին է Պուտինը»,- ասվում է Սպիտակ տան հայտարարության մեջ։

Ուկրաինայի նախագահ Վլադիմիր Զելենսկին իր երախտագիտությունն է հայտնել ԱՄՆ Սենատին ու նշել, որ անհամբերությամբ սպասում է օրինագծի ստորագրմանը։