Ռաիսին սպառնացել է` կրկին հարձակվելու դեպքում Իսրայելը կարող է դադարել գոյություն ունենալ

Կրկին հարձակվելու դեպքում Իսրայելը կարող է դադարել գոյություն ունենալ։ Այս մասին հայտարարել է Իրանի նախագահ Էբրահիմ Ռաիսին՝ Պակիստանում ելույթ ունենալով Լահորի համալսարանի ուսանողների հետ հանդիպմանը, փոխանցում է IRNA-ն:

«Եթե Իսրայելը նորից սխալվի և հարձակվի Իրանի տարածքի վրա, ապա բոլորովին այլ հետևանքներ կլինեն, և պարզ չէ՝ արդյո՞ք Իսրայելից որևէ բան կմնա»,- ասել է Ռաիսին։

Ապրիլի սկզբին Իսրայելը հարձակվեց Դամասկոսում Իրանի գլխավոր հյուպատոսության վրա։ Իսլամական հեղափոխության պահապանների կորպուսի տվյալներով՝ սպանվել է յոթ իրանցի սպա, այդ թվում՝ երկու ավագ գլխավոր խորհրդական։ Երկու շաբաթ անց Թեհրանը պատասխան հարված հասցրեց Իսրայելի տարածքին, տարբեր աղբյուրների համաձայն՝ արձակելով մինչև մի քանի հարյուր անօդաչու թռչող սարք և հրթիռներ, այդ թվում՝ գերձայնային Ֆաթթահ և Ֆաթթահ-2: Իսրայելի իշխանությունները հայտարարեցին, որ միայն «մի քանի հրթիռներ» են հասել երկրի տարածք և պատճառել «փոքր վնաս»:

Իրանի Զինված ուժերի գլխավոր շտաբի պետ Մոհամմադ Բաղերին ասել է, որ Թեհրանն ավարտել է «Ճշմարիտ խոստում» գործողությունը և չի ծրագրում այն շարունակել։ Ավելին, եթե Իսրայելը պատասխան քայլեր ձեռնարկի, իրանական հաջորդ գործողությունն ավելի մեծ կլինի։

Ապրիլի 19-ի գիշերը Իսրայելը անօդաչու սարքերի կիրառմամբ «սահմանափակ» պատասխան հարված է հասցրել Իրանի թիրախներին։ Նշվում է, որ  հնարավոր թիրախ կարող էր լինել Սպահանի տարածքում գտնվող ավիաբազան։

Իրանը չէր հերքել ԱԹՍ-ներ խոցելու մասին լուրերը, սակայն հայտնել էր, որ արտաքին հարձակման չի ենթարկվել։

Իսրայելը չի մեկնաբանել միջադեպը։