Սանկտ Պետերբուրգում որոշել են արգելել ԱԹՍ-ների հարձակումների հետևանքների մասին հրապարակումները

Սանկտ Պետերբուրգում կարող է արգելվել անօդաչու թռչող սարքերի հարձակումների հետևանքների մասին ցանկացած տեղեկատվության, այդ թվում՝ ֆոտո և վիդեո նյութերի տարածումը։ Այս մասին է վկայում նահանգապետ Ալեքսանդր Բեգլովի որոշման նախագիծը, փոխանցում է VOA-ն։

Եթե փաստաթուղթն ընդունվի, ապա արգելք կսահմանվի ցանկացած տեղեկության տարածման վրա, որը կարող է նպաստել Զինված ուժերի, կապի համակարգերի, վառելիքաէներգետիկ համալիրների օբյեկտների պահպանման համակարգերի, արդյունաբերության, կամուրջների ու նավահանգստային գոտիների տեղանքի բացահայտմանը։

Բանաձևի նախագծում չի ասվում, թե ինչ պատիժ է նախատեսված արգելքը հնարավոր խախտողների համար։ Այժմ փաստաթուղթը հաստատման փուլում է, որը կտևի մինչև մայիսի 5-ը։

Մարտի սկզբին նմանատիպ սահմանափակում մտցվեց Լենինգրադի մարզում։

Մարտի 12-ին էլ Կուրսկի մարզում արգելք է դրվել Ռուսաստանի Զինված ուժերի գործողությունների մասին տեղեկատվությունը համացանցում և լրատվամիջոցներում տեղադրելու համար։ Արգելվել է լուսանկարներ և տեսանյութեր տարածել, որոնք պատկերում են զինվորականների գտնվելու վայրը, ինչպես նաև ռազմական ենթակառուցվածքները և կարևոր օբյեկտները։ Իշխանությունները նաև արգելել են հրետակոծությունների կամ արկերի խոցման վայրերի, զենքի, հակաօդային պաշտպանության համակարգերի և անօդաչու թռչող սարքերի կիրառման մասին տեղեկատվության հրապարակումը։

Ռուսաստանում քրեական պատասխանատվություն չկա ռուսական օբյեկտների վրա ուկրաինական հարձակումների հետևանքների մասին համացանցում լուսանկարներ և տեսանյութեր հրապարակելու համար։ Անցյալ տարեվերջին ՌԴ նախագահի խոսնակ Դմիտրի Պեսկովն ասել էր, որ Կրեմլը դեռ չի քննարկում նման խախտումների համար քրեական պատիժ սահմանելու հարցը։