22.02.2026 | 22:33
Ձմեռային Օլիմպիական խաղերի մեդալային հաշվարկում Նորվեգիան հաղթեց ռեկորդով
Պուտինն ու Ալիևը քննարկել են նաև Հայաստան-Ադրբեջան բանակցությունները․ Հաջիև
Քաղաքականություն
23.04.2024 | 16:45
Ադրբեջանի նախագահի օգնական Հիքմեթ Հաջիևն անդրադարձնել է նախօրեին Իլհամ Ալիևի՝ Մոսկվա կատարած այցին ու ՌԴ նախագահ Վլադիմիր Պուտինի հետ բանակցություններին։
«Ադրբեջանական կողմը շատ դրական է գնահատում այս այցի արդյունքները։ Ցանկանում եմ նշել, որ այցը տեղի է ունեցել Ադրբեջանի և Ռուսաստանի միջև ռազմավարական գործընկերության և դաշնակցային հարաբերությունների ոգով։ Այցի ընթացքում պետությունների ղեկավարները քննարկել են երկկողմ օրակարգին առնչվող հարցեր, որոնք վերաբերում են Ադրբեջանի և Ռուսաստանի քաղաքական, տնտեսական և առևտրային հարաբերություններին, փոխադարձ ներդրումներին, հումանիտար և այլ հարցերի։ Որպես դրական զարգացում՝ հատկապես կարևորվել է ապրանքաշրջանառության ծավալների աճը։ Գոհունակությամբ նշվել է, որ ադրբեջանա-ռուսական հարաբերությունների գրեթե բոլոր բնագավառներում առկա է դրական դինամիկա»,- ասել է Հաջիևը։
Ըստ նրա՝ քննարկվել է նաև Հյուսիս-Հարավ միջազգային տրանսպորտային միջանցքը, պետությունների ղեկավարները կառավարության ներկայացուցիչներին հանձնարարել են անհրաժեշտ քայլեր ձեռնարկել այս ծրագրի իրականացման համար։
«Երկու երկրների ղեկավարները քննարկել են նաև Ադրբեջանի և Հայաստանի միջև խաղաղության պայմանագրի շուրջ բանակցությունները։ Նախագահ Իլհամ Ալիևը բարձր է գնահատել Ռուսաստանի դերն ու ջանքերն այս ոլորտում»,- նշել է Ալիևի օգնականը։
Հաջիևը հայտարարել է, որ ընդհանուր առմամբ, Իլհամ Ալիևի այցը Ռուսաստան ևս մեկ դրական ներդրում էր «երկու երկրների միջև ռազմավարական գործընկերության և դաշնակցային հարաբերությունների զարգացման գործում»։
