Սահմանազատումը Բրյուսելի քննարկումների առանցքային տարրն էր․ Շառլ Միշելը ողջունել է Հայաստանի և Ադրբեջանի միջև համաձայնագիրը

Եվրոպական խորհրդի նախագահ Շառլ Միշելը ողջունել է սահմանների սահմանազատման հարցում Հայաստանի և Ադրբեջանի միջև նախօրեին ձեռք բերված պայմանավորվածությունը:

«Ջերմորեն ողջունում ենք Հայաստանի և Ադրբեջանի միջև համաձայնագիրը` հիմնված 1991թ. Ալմա Աթայի հռչակագրի վրա՝ որպես երկու երկրների միջև սահմանների սահմանազատման հիմք:

Սահմանների սահմանազատումը, որը հիմնված է յուրաքանչյուր երկրի տարածքային ամբողջականության միանշանակ ճանաչման վրա, Բրյուսելի քննարկումների առանցքային տարրն էր և էական քայլ կլինի նորմալացման և ողջ տարածաշրջանում խաղաղության հաստատման համար»,– գրել է Միշելը X—ի իր էջում։

Հիշեցնենք, որ երեկ տեղի է ունեցել Հայաստանի և Ադրբեջանի սահմանազատման պետական հանձնաժողովների 8-րդ հանդիպումը՝ փոխվարչապետներ Մհեր Գրիգորյանի և Շահին Մուստաֆաևի նախագահությամբ:

ՀՀ ԱԳՆ-ից հայտնում են, որ հանդիպման արդյունքներով պայմանավորվածություն է ձեռք բերվել՝ սահմանազատման գործընթացում կառաջնորդվեն Ալմա Աթայի 1991 թվականի հռչակագրով, բայց եթե հետագայում Հայաստանի և Ադրբեջանի միջև «Խաղաղության և միջպետական հարաբերությունների հաստատման մասին համաձայնագրով» (խաղաղության պայմանագրով) կնախատեսվեն այլ կարգավորումներ, ապա հանձնաժողովի կանոնակարգի համապատասխան դրույթները կհամապատասխանեցվեն խաղաղության պայմանագրի սկզբունքներին:1

Նշենք նաև, որ մինչ այս պահը Հայաստանի և Ադրբեջանի սահմանազատման հանձնաժողովների միջև ձեռք բերված համաձայնությանը ողջունել են ԱՄՆ պետքարտուղար Էնթոնի Բլինքենը, ՄԱԿ-ի գլխավոր քարտուղար Անտոնիո Գուտերեշը, Գերմանիայի ԱԳՆ-ն,  Թուրքիայի ԱԳՆ-ն։  Ռուսաստանի Դաշնությունից դեռևս չեն արձագանքել։