Կա´մ Թուրքիան ճնշել է մեր իշխանություններին, կա´մ նրանք չգիտեն, թե ինչ են խոսում. ցեղասպանագետ․ ՏԵՍԱՆՅՈՒԹ

«Ցեղասպանություն երևույթի բնորոշումը թվերի հետ կապ չունի, էական չէ՝ քանի մարդ է զոհվել: Ցեղասպանությունը զանգվածային մարդասպանություն չէ, այն հանցագործություն է, որի նպատակն է ոչնչացնել մարդկանց խումբը»,- Factor TV-ի հետ զրույցում նշում է ցեղասպանագետ Սուրեն Մանուկյանը՝ անդրադառնալով ԱԺ պաշտպանության հանձնաժողովի նախագահ Անդրանիկ Քոչարյանի հայտարարությանը (նա հղում է կատարել վարչապետ Նիկոլ Փաշինյանին) այն մասին, թե անհրաժեշտ է ցուցակագրել Հայոց ցեղասպանության զոհերին և «ավելի առարկայական դարձնել ցեղասպանության ենթարկված հայրենակիցների ամբողջ ցանկը»:

Սուրեն Մանուկյանը տեսակետ է հայտնում այն մասին, թե ինչու է իշխանական շրջանակների կողմից ապրիլի 24-ին ընդառաջ նման թեմա շրջանառվում։

«Առաջին պատճառը հիմարության կանխավարկածն է. մարդիկ շատ դեպքերում չեն տիրապետում նյութին, որի մասին խոսում են: Անդրանիկ Քոչարյանը չի պատկերացնում՝ ինչ է ասում: Խոսվում է զոհերին ցուցակագրելու մասին, բայց տարօրինակ կլիներ, որ մարդասպանները զոհերի ցուցակ կազմեին, այդ ցուցակով մարդկանց սպանեին ու ցուցակն էլ հանձնեին արխիվ»,- ասում է նա:

Նշյալ թեզը շրջանառելու երկրորդ հնարավոր պատճառը, ըստ Մանուկյանի, այն է, որ Թուրքիան, գուցե, ճնշել է մեր իշխանությանը. «Մեր իշխանությունը փորձում է ցույց տալ, որ պատրաստ է զիջումների գնալ Հայոց ցեղասպանության հարցում, որ դա իր համար տաբու թեմա չէ, որ պատրաստ է զոհերի թվի հետ կապված քննարկման մեջ մտնել թուրքական կողմի հետ: Կամ էլ, հնարավոր է, որ մեր իշխանությունը հենց իր նախաձեռնությամբ է շրջանառում այդ թեզը, էլի ցույց տալու համար, որ պատրաստ է քննարկումների»:

Սուրեն Մանուկյանն այն համոզման է, որ Անդրանիկ Քոչարյանն իր հայտարարության պատճառով հայտնվել է ծիծաղելի իրավիճակում. «Մենք տեսականորեն 50-60 տարի հետո կարող ենք զոհերի ցուցակ ունենալ, բայց այդպես էլ չհասնել վերջնարդյունքի. ժամանակ ենք կորցնելու»:

Մանրամասները՝ տեսանյութում:

Աննա Բաբաջանյան