30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԵՄ երկրները համաձայնության են եկել Իրանի դեմ նոր պատժամիջոցների շուրջ
Քաղաքականություն
18.04.2024 | 13:16
Եվրամիության երկրների և կառավարությունների ղեկավարները Բրյուսելում տեղի ունեցած գագաթնաժողովում պայմանավորվել են ընդլայնել Իրանի դեմ պատժամիջոցները՝ Իսրայելի վրա աննախադեպ հարձակման համար, գրում է DW-ի ռուսական ծառայությունը:
«Մենք որոշել ենք լրացուցիչ պատժամիջոցներ սահմանել Իրանի դեմ։ Սա հստակ ազդանշան է, որը ցանկանում ենք ուղարկել»,- ասել է Եվրոպական խորհրդի նախագահ Շառլ Միշելը։
Նա ընդգծել է, որ Իրանը պետք է հայտնվի միջազգային մեկուսացման մեջ։
«Եվրախորհուրդը խստորեն և միանշանակ դատապարտում է Իրանի հարձակումն Իսրայելի վրա, վերահաստատում իր լիակատար համերաշխությունն Իսրայելի ժողովրդի հետ և հավատարմությունը Իսրայելի անվտանգությանն ու կայունությանը տարածաշրջանում»,- ասված է հանդիպման առաջին օրվա վերջում ընդունված հռչակագրում։
Հակամարտության բոլոր կողմերին ԵՄ երկրների ղեկավարները կոչ են արել առավելագույն զսպվածություն ցուցաբերել։
«Եվրախորհուրդը կոչ է անում Իրանին և նրա վստահված անձանց՝ դադարեցնել ցանկացած հարձակում, ինչպես նաև կոչ է անում բոլոր կողմերին՝ ցուցաբերել առավելագույն զսպվածություն և զերծ մնալ ցանկացած գործողությունից, որը կարող է մեծացնել լարվածությունը տարածաշրջանում»,- ասվում է եզրափակիչ հայտարարության մեջ։
Ավելի վաղ Գերմանիայի կանցլեր Օլաֆ Շոլցն Իսրայելին կոչ էր արել զերծ մնալ զանգվածային հարձակումից՝ ի պատասխան Իրանի հարձակման, արտգործնախարար Աննալենա Բերբոքն էլ զսպվածության կոչ էր արել։
