Վրաստանում պատրաստվում են նոր ցույցերի․ խորհրդարանի շենքում անվտանգության «դեղին» մակարդակ է հայտարարվել

Թբիլիսիում այսօր նույնպես պատրաստվում են բողոքի ցույցեր անցկացնել, հայտնում է OC Media-ն։ Նշվում է, որ քաղաքացիներն արդեն օրն են պատրաստվում հավաքվել բողոքի ցույցերի, քանի որ «օտարերկրյա գործակալների մասին» օրինագիծն առաջին ընթերցմամբ քննարկվելու է Վրաստանի խորհրդարանի լիագումար նիստում այն բանից հետո, երբ իրավական հարցերի հանձնաժողովը կանաչ լույս է վառել վիճահարույց օրենքի համար։

Մինչ այդ, այսօր Վրաստանի խորհրդարանում գործելու է անվտանգության «դեղին» մակարդակ և հայտարարվել է անվտանգության լրացուցիչ միջոցառումների մասին։

«Վրաստանի խորհրդարանի շենքում անվտանգության կանոնները հաստատելու մասին խորհրդարանի նախագահի 2023 թվականի սեպտեմբերի 4-ի N1/259/23 հրամանի համաձայն՝ այս տարվա ապրիլի 16-ին անվտանգության «դեղին» մակարդակը կգործի խորհրդարանի պալատում, այցելուների համար մուտքը խորհրդարանի շենք կսահմանափակվի: Միայն համապատասխան կառուցվածքային ստորաբաժանումների կողմից հրավիրված անձանց կթույլատրվի մասնակցել ծրագրված խորհրդարանական միջոցառումներին։ Սահմանափակումը չի տարածվում հեռուստաընկերությունների/հեռուստամեդիայի հավատարմագրված լրագրողների վրա։ Այս միջոցառման նպատակը Վրաստանի խորհրդարանի շենքում աշխատանքային և անվտանգ միջավայրի ապահովումն է»,- ասվում է հայտարարության մեջ։

Հիշեցնենք, որ ապրիլի 15-ի առավոտյան Թբիլիսիում և Վրաստանի այլ քաղաքներում բողոքի ցույցեր էին սկսվել «օտարերկրյա գործակալների մասին» օրինագծի դեմ։ Մայրաքաղաքում քաղաքացիները հավաքվել էին Ռուսթավելի պողոտայում՝ խորհրդարանի շենքի մոտ։ Ակցիայի առաջին մասը սկսվել էր առավոտյան ժամը 10-ին, երբ խորհրդարանի իրավական հարցերի հանձնաժողովը սկսել է օրինագծի քննարկումը, երկրորդը՝ երեկոյան ժամը 7-ին։

Վրաստանի խորհրդարանի իրավական հարցերի հանձնաժողովն առաջին ընթերցմամբ հավանություն է տվել «օտարերկրյա գործակալների մասին» օրինագծին։ Այն իր բովանդակությամբ նույնական է անցյալ տարի նախաձեռնված նախագծին, որը հետ կանչվեց բողոքի ցույցերի պատճառով։