Քաղաքականություն
15.04.2024 | 18:08
Աշխատանքներ են տարվում Թեհրանում Ադրբեջանի դեսպանատան գործունեությունը վերսկսելու համար։ Այս մասին հայտարարել է Իրանի ԱԳՆ խոսնակ Նասեր Քանանին, փոխանցում է Mehr-ը։
«Նախապատրաստություններ են իրականացվել Թեհրանում Ադրբեջանի դիվանագիտական գործունեության վերսկսման համար, լավ բանակցություններ են անցկացվել արտգործնախարարների մակարդակով, Ադրբեջանի դիվանագիտական պատվիրակությունը որոշ ժամանակ առաջ՝ անցյալ տարվա վերջին, եկել էր Թեհրան՝ նախապատրաստվելու դեսպանատան վերաբացմանը»,- ասել է Քանանին՝ նշելով, որ «Իրանի և Ադրբեջանի միջև կա միաձայն կարծիք, որ երկու երկրների միջև քաղաքական համագործակցությունը պետք է զարգանա տնտեսության և այլ ոլորտների հետ մեկտեղ»։
Նա նաև ասել է, որ Ադրբեջանում Իրանի դեսպան Աբաս Մուսավիի առաքելության ավարտով պայմանավորված՝ դեսպանի ընտրությունը կկատարվի վարչական ընթացակարգով։
Հիշեցնենք՝ 2023 թվականի հունվարի 27-ին Իրանում Ադրբեջանի դեսպանատան վրա զինված հարձակում է տեղի ունեցել, որի հետևանքով 1 մարդ է զոհվել, երկուսը՝ վիրավորվել։ Պաշտոնական Բաքուն դեսպանատան վրա իրականացված հարձակումն «ահաբեկչություն» է որակել։
Միջադեպից հետո Բաքուն տարհանել էր Թեհրանում Ադրբեջանի դեսպանատան աշխատակիցներին, և մինչ օրս դեսպանատան գործունեությունը դադարեցված է։ Միջադեպից հետո Բաքուն ակտիվացրել էր հակաիրանական հռետորաբանությունն ու Ադրբեջանում կրոնական ակտիվիստների և հավատացյալների ձերբակալությունները։
