09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Ամիրյան փողոցն անվանափոխել Բեկոր Աշոտի անունով․ ավագանու անդամի հեղինակած նախագիծը
Քաղաքականություն
11.04.2024 | 14:57
Երևանի ավագանու հերթական նիստի օրակարգում 25 հարց է ընդգրկված Factor.am-ը տեղեկանում է քաղաքապետարանի կայքէջից։
Որոշման նախագծերից մեկով ավագանու ընդդիմադիր «Ազգային առաջընթաց» խմբակցության անդամ Հայկ Գրիգորյանն առաջարկում է Կենտրոն վարչական շրջանի Արսեն Ամիրյան փողոցն անվանափոխել Արցախյան ազատամարտի մասնակից, Արցախի հերոս, «Մարտական խաչ» առաջին աստիճանի շքանշանակիր Աշոտ Ղուլյանի (Բեկոր Աշոտ) անունով։
«Սերնդափոխությունը ենթադրում է քաղաքական հայացքների փոփոխություն, ու, ըստ այդմ, յուրաքանչյուր գործունեություն պետք է համապատասխանի տեղին, ժամանակին, ժողովրդի պահանջներին: Արցախի ազատագրական պայքարում Աշոտ Ղուլյանի ունեցած ներդրումը միանգամայն հիմնավորում է փողոցը նրա անունով վերանվանելու նախագիծը: Արցախը «կենդանի» պահելու մի հյուլ էլ դա կլինի։ Սույն նախագծով առաջարկվում է անվանափոխել Արսեն Ամիրյանի անունը կրող փողոցը Արցախյան ազատամարտի մասնակից, ԼՂՀ Ստեփանակերտի առաջին վաշտի հրամանատար, Արցախի հերոս, «Մարտական խաչ» առաջին աստիճանի շքանշանակիր Աշոտ Ղուլյանի (Բեկոր Աշոտ, Ասկոլկա) անունով»,- ասված է ավագանու ընդդիմադիր անդամի հեղինակած նախագծում։
Ամիրյան փողոցը սկսվում է Հանրապետության հրապարակից և հասնում մինչև Սարյան փողոց։ Նշենք, որ հրապարակախոս Արսեն Ամիրյանը եղել է բոլշևիկյան հեղափոխական, Բաքվի 26 կոմիսարներից։
Արփի Հակոբյան
