Եկե՛ք բոլոր թատրոնները փակենք, գնանք Սունդուկյան, «գոհ ու երջանիկ» աշխատենք. «Գոյ»-ի ռեժիսոր․ ՏԵՍԱՆՅՈՒԹ

«Այս վեճը պետք է լուծվի, իսկ լուծումը «Գոյ»-ի՝ մասնավոր թատրոն դառնալու մեջ է։ Մենք կառավարությանը ներկայացրել ենք առաջարկների փաթեթ։ Այս նստացույցը անկախ թատրոն դառնալու համար է»,-Factor TV-ի հետ զրույցում նշում է «Գոյ» թատրոնի կառավարման խորհրդի նախագահ Սարգիս Արզումանյանը, որն արդեն մի քանի օր է՝ թատրոնի դիմաց նստացույց է իրականացնում «Գոյ»-ը Գաբրիել Սունդուկյանի անվան ազգային ակադեմիական թատրոնին միավորելու դեմ։

Անդրադառնալով ԿԳՄՍ նախարար Ժաննա Անդրեասյանի այն հայտարարությանը, թե «Գոյ»-ին մասնավոր թատրոն դառնալու առաջարկ հնչել է հենց նախարարության կողմից, Սարգիս Արզումանյանը պատասխանում է․ «Դա մանիպուլյացիա է՝ առաջարկը եղել է մեր կողմից։ Մենք երկու պայման ենք դրել, որ «Գոյ» թատրոնի շենքը, տարածքը մնա մեզ, և մենք վարձավճար տանք պետությանը, ինչպես նաև՝ որ անցումային փուլի համար ֆինանսական աջակցություն ստանանք պետությունից։ Մեզ պատասխանեցին, որ եթե միանանք Սունդուկյան թատրոնին, տարածքը կմնա մեզ, ասացին, որ տարածքը վարձակալությամբ տալ չեն կարող, ֆինանսական աջակցությունն էլ կարող են հատկացնել Սունդուկյան թատրոնի խողովակով։ Դրան է, որ մենք դեմ ենք»։

«Գոյ»-ի հետ կապված դատական երկու գործընթաց կա Վարչական դատարանում․ «Երկուսն էլ մնացել են օդից կախված։ Տպավորություն է, որ դատավորները խուսափում են պատասխանատվություն վերցնել․ ո՛չ դատական նիստ է նշանակվել, ո՛չ էլ որևէ վճիռ կա»,-ասում է մեր զրուցակիցը։ Նա անդրադառնում է նաև Սունդուկյան թատրոնի դերասան Արմեն Մարությանի այն հայտարարությանը, թե յուրաքանչյուր դերասանի համար պետք է մեծ պատիվ լինի ընդունվել, խաղալ Մայր թատրոնում, ուստի՝ իր համար անհասկանալի է «Գոյ»-ի ստեղծագործական անձնակազմի դիրքորոշումը․ «Իհարկե, մեծ պատիվ է լինել Սունդուկյան թատրոնում, բայց ոչ այս ղեկավարության կողքին։ Եվ հետո՝՝ եթե այդպես է, եկեք բոլոր թատրոնները փակենք, գնանք Սունդուկյան թատրոն, գոհ ու երջանիկ աշխատենք»:

Մանրամասները՝ տեսանյութում։
Աննա Բաբաջանյան