Քաղաքականություն
04.04.2024 | 12:24
Թուրքիայի Գերագույն ընտրական խորհուրդը (YSK) վերականգնել է քրդամետ Ժողովուրդների հավասարություն և ժողովրդավարություն կուսակցությունից (DEM) Աբդուլլահ Զեյդանի՝ քաղաքապետի պաշտոնում ընտրության արդյունքները, որին տեղական ընտրական հանձնաժողովը մերժել էր տալ քաղաքապետի արտոնագիրը՝ չնայած Վանի ընտրություններում ձայների մեծամասնությամբ հաղթանակ տանելուն, հայտնում են թուրքական լրատվամիջոցները։
YSK-ում DEM կուսակցության ներկայացուցիչ Մեհմեդ Ռուշթյու Թիրյաքին հայտարարել է, որ խորհուրդը չեղարկել է Վանի նահանգային ընտրական խորհրդի որոշումը՝ քաղաքապետի արտոնագիրը տալով Զեյդանին։
«Քուրդ ժողովրդի, մեր ընկերների և ժողովրդավարական հասարակության դիմադրության արդյունքում որոշվեց, որ արտոնագիրը կստանա Աբդուլլահ Զեյդանը։ Կեցցե՛ քուրդ ժողովրդի դիմադրությունը»,- ասվում է DEM կուսակցության X-ի էջում գրառման մեջ։
Հիշեցնենք՝ Վանի նահանգային ընտրական խորհուրդը իշխող «Արդարություն և զարգացում» կուսակցության թեկնածուին էր տվել քաղաքապետի պաշտոնը՝ չնայած ընտրություններում քրդամետ «Ժողովուրդների հավասարություն և ժողովրդավարություն» կուսակցության համոզիչ հաղթանակին։ Ընտրական հանձնաժողովը որոշել էր «ընտրությունների վկայականը» (փաստաթուղթ, որը հաստատում է ընտրված թեկնածուի կառավարման իրավունքը) տալ ԱԶԿ անդամ Աբդուլահաթ Արվասին, որը նահանգում ստացել է ձայների միայն 27,15 տոկոսը։ Որոշվել է չեղյալ համարել DEM կուսակցության թեկնածու Աբդուլլահ Զեյդանի ընտրվելու իրավունքը՝ համաձայն Արդարադատության նախարարության վերջին դիմումի։ Նա հաղթել է Վանի ընտրություններում ձայների ճնշող մեծամասնությամբ՝ 55,48 տոկոսով։ Այս որոշման պատճառով Վանում բողոքի ակցիաները չէին դադարում։ Տասնյակ հազարավոր մարդիկ բողոքում էին Վանում ընտրությունները գրավելու կառավարության ջանքերի դեմ՝ չնայած արցունքաբեր գազով և ջրցան մեքենաներով ոստիկանական հարձակումներին:
YSK-ի որոշումների հրապարակումից հետո հազարավոր մարդիկ շտապել են դեպի DEM կուսակցության շենք՝ հաղթանակը տոնելու։
Abdullah Zeydan'ın başkanlığının YSK tarafından iade edilmesi Van sokaklarında kutlandı. pic.twitter.com/jkqnYIS6Lu
— duvaR (@gazeteduvar) April 3, 2024
Էմմա Չոբանյան
