15.07.2026 | 17:41
Կարծում եմ՝ Պուտինը պատրաստ է խաղաղության համաձայնագիր կնքել․ Թրամփ
Սահմանին լարվածության աճը որևէ արդարացում չի կարող ունենալ․ Բլինքենը՝ Ալիևին
Քաղաքականություն
04.04.2024 | 10:49
ԱՄՆ Պետքարտուղարությունը մանրամասներ է ներկայացրել պետքարտուղար Էնթոնի Բլինքենի ու Ադրբեջանի նախագահ Իլհամ Ալիևի նախօրեին կայացած հեռախոսազրույցից։ Ամերիկյան կողմի հաղորդագրության մեջ ասվում է, որ Բլինքենն ընդգծել է ԱՄՆ-ի և Ադրբեջանի երկկողմ հարաբերությունների կարևորությունը, գործընկերային նախաձեռնությունների աճը, ներառյալ՝ էներգետիկայի և կլիմայի փոփոխությունների հարցում առաջնահերթությունները:
«Պետքարտուղար Բլինքենը և նախագահ Ալիևը քննարկել են Ադրբեջանի և Հայաստանի միջև խաղաղ գործընթացն առաջ մղելու կարևորությունը, որը տնտեսական օգուտներ կբերի ողջ տարածաշրջանին։ Պետքարտուղարն ընդգծել է, որ սահմանին լարվածության ավելացման համար որևէ արդարացում չկա, և նախազգուշացրել է, որ ցանկացած կողմից ագրեսիվ գործողություններն ու հռետորաբանությունը կխաթարեն խաղաղության հեռանկարները»,-ասվում է հաղորդագրության մեջ։
ԱՄՆ պետքարտուղարը նաև վերահաստատել է Ադրբեջանի կողմից մարդու իրավունքների և հիմնարար ազատությունների հետ կապված իր միջազգային պարտավորությունները և հանձնառությունները կատարելու անհրաժեշտությունը և հորդորել է ազատ արձակել անարդարացիորեն ձերբակալվածներին:
Հիշեցնենք, որ ըստ ադրբեջանական կողմի հաղորդագրության՝ Ալիևը հիմնականում դժգոհել էր ապրիլի 5-ին Բրյուսելում կայանալիք ՀՀ-ԱՄՆ-ԵՄ եռակողմ հանդիպման անցկացումից։
