10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Երևանի և Աթենքի հարաբերություններն ուղղված չեն Բաքվի դեմ․ Ադրբեջանում Հունաստանի դեսպան
Քաղաքականություն
03.04.2024 | 16:32
Ադրբեջանում Հունաստանի դեսպան Խրիստոս Կապոդիստրիասն ադրբեջանական ԱՊԱ-ին տված հարցազրույցում հայտարարել է, որ հայ-հունական հարաբերություններն ուղղված չեն Բաքվի դեմ։
«Մենք իսկապես երկար տարիների հարաբերություններ ունենք Հայաստանի հետ։ Բայց կարող եմ ձեզ վստահեցնել, որ այդ հարաբերությունները ոչ մի կերպ ուղղված չեն Ադրբեջանի մեր ընկերների դեմ»,- ասել է դեսպանը։
Նա, միաժամանակ, ուշադրություն է հրավիրել թուրք-ադրբեջանական հարաբերությունների վրա։
«Դուք նույնպես սերտ հարաբերություններ ունեք Թուրքիայի հետ, և մենք, իհարկե, գիտենք, որ դա ուղղված չէ Հունաստանի դեմ։ Սրանք միջազգային հարաբերություններ են, ուստի շատ կարևոր է, որ բոլորը կարծիքներ փոխանակեն, երկխոսեն, և ուրախալի է, որ մենք ունենք նման հնարավորություն»,- նշել է Կապոդիստրիասը՝ հիշեցնելով Հունաստանի փոխարտգործնախարար Ալեքսանդրա Պապադոպուլոսի՝ Բաքու վերջին այցի մասին ու ընդգծել, որ այցի ընթացքում արդյունավետ քննարկումներ են եղել ադրբեջանցի գործընկեր Ֆարիզ Ռզաևի հետ։
Հավելենք՝ Բաքուն վերջին շրջանում մտահոգված է Հայաստանի և Հունաստանի միջև տարբեր, հատկապես՝ ռազմական ոլորտում զարգացող հարաբերությունների առնչությամբ։ Մասնավորապես, մարտի վերջին Ադրբեջանի ԱԳՆ-ի հայտարարությունը, որն ուղղված էր ապրիլի 5-ին Բրյուսելում կայանալիք ՀՀ-ԵՄ-ԱՄՆ գագաթնաժողովին, մեղադրանքներ էր պարունակում նաև Հունաստանի հասցեին։
«Մտահոգության մեկ այլ հարց էլ Հայաստանի ռազմականացմանն ուղղված Ֆրանսիայի արշավն է, որը ներառում է ռազմական մատակարարումների ավելացման նոր խոստումներ։ ԵՄ մեկ այլ անդամ՝ Հունաստանը, վերջերս հայտարարություններ է արել Հայաստանի հետ ռազմական համագործակցության խորացման մասին։ Բացի այդ, Խաղաղության եվրոպական հիմնադրամի շրջանակում Հայաստանին ռազմական օգնություն տրամադրելու ծրագրերն ու տեղեկությունը, որ ապրիլի 5-ին կայանալիք հանդիպումը կներառի ռազմական բաղադրիչներ, առաջացնում է հետագա մտահոգություններ և խաթարում է տարածաշրջանում խաղաղության կառուցման ջանքերը»,- ասվում էր հայտարարությունում։
Էմմա Չոբանյան
